पुणे: पुण्यातील भिगवण परिसरात मुलीचं अपहरण प्रकरण चांगलंच तापलं आहे. त्यातच आता माझे माझ्या प्रियकरावर प्रचंड प्रेम असून त्याने माझ्यावर अजिबात जबरदस्ती केली नाही, माझ्या मर्जीनेच मी घराबाहेर पडल्याचे तरुणीने स्पष्ट केले. परंतु तसे सांगण्यासाठी तिच्यावर दबाव असल्याचे भाजप नेते तथा आमदार गोपीचंद पडळकर म्हणाले. त्यांनी पोलिसांच्या तपासावर नाराजी व्यक्त केली. पुण्याच्या पोलीस अधीक्षकांनी मुलीला सुखरूपपणे कुटुंबियांकडे आणून सोडावी, मी त्यांची हत्तीवरून मिरवणूक काढतो, असे पडळकर म्हणाले.
भिगवण येथून मंगळवारी दुपारी तीन वाजता मुलीचे अपहरण झाल्याचे सांगण्यात आले. मुलगी खरेदीहून येत असताना आरोपीने मुलीच्या घरच्यांच्या डोळ्यात मिरचीपूड टाकून मुलीचे अपहरण केल्याचा आरोप आहे. मात्र कथित अपहरणाच्या २४ तासांनंतर माझे अपहरण झालेले नसून आमचे प्रेमप्रकरण असल्याचे मुलीने व्हिडीओद्वारे सांगितले आहे. हे अपहरण प्रकरण राज्यभरात चर्चेचा विषय ठरल्यानंतर पडळकर भिगवणला आले. तिथे हजारोंचा जमाव जमला होता. पडळकर यांच्या नेतृत्वात हिंदू जनआक्रोश मोर्चाचे आयोजनही केले गेले होते. परंतु पोलिसांनी मज्जाव केल्याने मोर्चा होऊ शकला नाही.
'...त्यांची हत्तीवरून मिरवणूक काढतो'
त्यानंतर पडळकर यांनी माध्यम प्रतिनिधींशी संवाद साधला. पडळकर म्हणाले, अपहरणाच्या गुन्ह्यात आरोपीला अटक करण्यात यावे. याआधी अजहर शेखने तलाठ्याला मारहाण केली मात्र पोलिसांनी अटक केली नाही. त्याच्यावर अनेक प्रकरणात गुन्हे दाखल आहेत. खरे तर त्याच्यावर मोक्कांतर्गत कारवाई करून त्याला बेड्या ठोकाव्यात. आमची मुलगी तिच्या आईच्या ताब्यात आणून द्यावी. MPSC पास झालेल्या मुलासोबत मुलीचे लग्न ठरले होते. पोलीस अधीक्षकांनी मुलीची सुखरूपपणे सुटका करावी, आम्ही त्यांची हत्तीवरून मिरवणूक काढतो.
मुलीची टिकली गायब
पोलिसांकडून आम्हाला त्वरित निकाल पाहिजे. व्हिडिओमध्ये मुलीची टिकली गायब केली आहे. हा मताचा विषय नाही तर हा आमच्या अस्तित्वाचा विषय आहे. भारतासारखा सुरक्षित देश जगात कुठे नाही. भारत हरल्यावर जे फटाके उडवतात, त्यांना जागा दाखवायची वेळ आली असल्याचे पडळकर म्हणाले.
काय म्हणाली संबंधित मुलगी?
भिगवण येथील मुलीच्या अपहरण प्रकरणात नवा ट्विस्ट आला असून संबंधित मुलीने आपण स्वमर्जीने घराबाहेर पडल्याचे सांगितले आहे. माझ्यावर कुणाचीही जबरदस्ती नाही, माझे त्या मुलावर प्रेम आहे, असा कबुलीजबाब मुलीने दिला आहे.