मुंबई-दिल्लीत रंगणार सुरांची मैफल
जागतिक संगीत क्षेत्रातील दिग्गज नाव आणि आपल्या मनमोहक डान्स मूव्हसने लाखो चाहत्यांना भुरळ घालणारी पॉप स्टार शकीरा तब्बल १९ वर्षांनंतर पुन्हा एकदा भारतीय रंगमंचावर अवतरणार आहे. विशेष म्हणजे, या ऐतिहासिक दौऱ्यात शकीरा केवळ एका नव्हे, तर मुंबई आणि दिल्ली अशा दोन प्रमुख शहरांमध्ये तिचे धमाकेदार कॉन्सर्ट सादर करणार आहे. या बातमीमुळे भारतीय संगीत प्रेमींमध्ये आनंदाचे उधाण आले असून सोशल मीडियावर या दौऱ्याचीच चर्चा रंगली आहे.
शकीराचा पहिला परफॉर्मन्स १० एप्रिल रोजी मुंबईत पार पडणार असून त्यानंतर १५ एप्रिल रोजी दिल्लीत ती आपल्या आवाजाची जादू दाखविणार आहे. शकीराचा भारत दौरा दोन शहरांमध्ये आयोजित होण्याची ही पहिलीच वेळ आहे. शकीरा आणि भारताचे नाते जुने आहे. तिने शेवटचा परफॉर्मन्स २००७ मध्ये मुंबईत तिच्या ‘ओरल फिक्सेशन टूर’ दरम्यान दिला होता. त्यानंतर आता तब्बल १९ वर्षांनी ती भारतात परतत आहे. या पुनरागमनाबद्दल शकीरा स्वतः अत्यंत उत्साही आणि भावुक आहे. ती म्हणते की, “भारतात परफॉर्म करणे माझ्यासाठी नेहमीच खास राहिले आहे. मुंबई आणि दिल्लीतील चाहत्यांशी पुन्हा एकदा जोडले जाणे हा माझ्यासाठी एक अविस्मरणीय अनुभव असेल.” विशेष म्हणजे, हा ‘फीडिंग इंडिया कॉन्सर्ट’ असून या माध्यमातून ती मुलांचे पोषण आणि उज्ज्वल भविष्याचा संदेश देणार आहे.
शकीराची संगीत कारकीर्द तीन दशकांहून अधिक काळ गाजलेली आहे. ९० च्या दशकात तिने आपल्या प्रवासाला सुरुवात केली आणि अल्पावधीतच ती जगातील सर्वात लोकप्रिय पॉप सिंगर्सच्या यादीत अग्रस्थानी पोहोचली. तिचे ‘हिप्स डोन्ट लाय’, ‘व्हेनएव्हर, व्हेरएव्हर’, ‘वाका वाका’ (फिफा वर्ल्ड कप अँथम), ‘शी वुल्फ’ आणि ‘ला टोर्टुरा’ यांसारख्या गाण्यांनी तिला जागतिक स्तरावर एक वेगळी ओळख मिळवून दिली आहे. शकीराची ऊर्जा, तिची खास बेली डान्स शैली आणि स्टेजवरील उपस्थिती भारतीय प्रेक्षकांसाठी पर्वणी ठरणार आहे.