मुंबई (विशेष प्रतिनिधी) : होळीचा सण जवळ आला की सारेच जण ‘होळी रे होळी, पुरणाची पोळी’, अशी हाळी देतात. मुंबईकरांना होळीच्या सणाला घरपोच पुरणपोळीचा स्वाद चाखायला मिळणार आहे. होळी सणाच्या निमित्ताने महानगरपालिकेने अर्थसहाय्य केलेल्या महिला बचत गटांनी तयार केलेल्या पुरणपोळ्या मुंबईकरांना उपलब्ध होणार आहेत. त्यासाठी २६फेब्रुवारी ते १ मार्च २०२६ दरम्यान ‘पुरणपोळी महोत्सव २०२६’ होणार आहे. या अंतर्गत shgeshop.com या संकेतस्थळावर नागरिक ऑनलाईन नोंदणी करू शकतात. त्यानंतर २ मार्च २०२६ रोजी पुरणपोळ्यांचे घरपोच वितरण केले जाणार आहे.
मुंबई महानगरपालिकेने अर्थसहाय्य केलेल्या या महिला बचत गटांनी गत वर्षी गुढीपाडव्याच्यानिमित्ताने पुरणपोळी महोत्सव राबविला होता. त्याला मिळालेला उत्कृष्ट प्रतिसाद लक्षात घेता सार्वजनिक श्रीगणेशोत्सव-२०२५ च्या पार्श्वभूमीवर या महिला बचत गटांकडून ‘मोदक महोत्सव- २०२५’ चे देखील आयोजन करण्यात आले होते. त्यानंतर आता पुन्हा एकदा पुरणपोळी महोत्सवाचे आयोजन केले आहे.
होळीच्या दिवशी पुरणपोळीला खूप मागणी असते. त्यामुळे वाढत्या मागणीचा विचार करून महिला बचत गटांनी हा महोत्सव सुरू केला आहे. या अंतर्गत पारंपरिक पुरणपोळी ग्राहकांना मिळणार आहेत. ज्यांना बचत गटांनी तयार केलेली पुरणपोळी हवी असेल त्यांनी shgeshop.com या संकेतस्थळावर २६ फेब्रुवारी २०२६ ते १ मार्च २०२६ या कालावधी दरम्यान ऑनलाईन मागणी नोंदवायची आहे. ऑनलाईन नोंदणी केल्यानंतर, होळीच्या दिवशी म्हणजेच मंगळवार दिनांक ३ मार्च २०२६ रोजी संबंधित ग्राहकांना पुरणपोळी घरपोच मिळणार आहे, अशी माहिती संचालक (नियोजन) डॉ. प्राची जांभेकर यांनी दिली आहे.