दिल्ली: आसामच्या दाट जंगलात बेपत्ता झालेल्या त्या 'सुखोई-३०' विमानाबाबतची भीती अखेर खरी ठरली आहे. तासनतास सुरू असलेल्या शोधमोहिमेनंतर भारतीय वायूसेनेने अत्यंत जड अंतःकरणाने एक दुःखद बातमी दिली. या भीषण दुर्घटनेत भारतीय वायुदलाने हिरा गमावला. स्क्वॉड्रन लीडर अनुज आणि फ्लाईट लेफ्टनंट पूर्वेश दुरगकर या दोन तरुण वैमानिकांचा या दुर्घटनेत निधन झाल्याचं स्पष्ट केलं.
गुरुवारी संध्याकाळी सुखोई विमान रडारवरून अचानक गायब झालं आणि संपर्क तुटला, तेव्हा संपूर्ण देश त्यांच्या सुखरूप परतण्यासाठी प्रार्थना करत होता. मात्र, कार्बी आंगलाँगच्या डोंगराळ भागात विमानाचा ढिगारा सापडला. सुखोई 30 विमान डोंगरांमध्ये क्रॅश झाल्याची माहिती समोर आली. स्क्वॉड्रन लीडर अनुज आणि फ्लाईट लेफ्टनंट पूर्वेश दुरगकर यांचंही निधन झालं आहे.
वायूसेनेने जारी केलेल्या निवेदनात म्हटलं आहे की, "स्क्वॉड्रन लीडर अनुज आणि फ्लाईट लेफ्टनंट पूर्वेश दुरगकर यांना या अपघातात गंभीर दुखापत झाली आणि त्यांचं निधन झालं. भारतीय वायूसेना या वीर जवानांच्या कुटुंबियांच्या दुःखात खंबीरपणे पाठीशी उभी आहे."
गुरुवारी सायंकाळी ७ च्या सुमारास या विमानाने जोरहाट एअरबेसवरून उड्डाण केले होते. त्यानंतर अवघ्या ४० मिनिटांतच, म्हणजे सायंकाळी ७.४२ वाजता विमानाचा रडारशी असलेला संपर्क तुटला. विमान नियोजित वेळेत परत न आल्याने हवाई दलाने तातडीने शोधमोहीम हाती घेतली होती. रात्रभर चाललेल्या या मोहिमेनंतर चोकीहोला परिसरातील जंगलात विमानाचा ढिगारा सापडला.
विमान बेपत्ता झाल्यानंतर हवाई दलाने आणि लष्कराने शोध पथके घटनास्थळी रवाना केली होती. कार्बी आंगलाँगचा हा भाग अत्यंत दुर्गम आणि डोंगराळ असल्याने शोध कार्यात अडचणी येत होत्या. मात्र, विमानाचा शोध लागल्यानंतर दोन्ही वैमानिकांना गंभीर दुखापत झाल्यामुळे त्यांचा मृत्यू झाल्याचे स्पष्ट झाले. हे विमान एका नियमित ट्रेनिंग मिशनवर असताना ही दुर्घटना घडली. विमानाचा रडारशी संपर्क नेमका कोणत्या कारणामुळे तुटला आणि हा अपघात तांत्रिक बिघाडामुळे झाला की अन्य काही कारणामुळे, याचा शोध घेण्यासाठी हवाई दलाने उच्चस्तरीय चौकशीचे आदेश दिले आहेत.