दानशूर संस्था व नागरिकांना योगदान देण्यासाठी प्लॅटफॉर्म उभारण्याचा प्रस्ताव, आमदार अमीत साटम यांचे महापौर रितू तावडे आणि आयुक्त भूषण गगराणी यांना पत्र
शालेय साहित्य, रुग्णालयीन उपकरणे, वॉटर कूलर आदी गरजा १५ दिवसांसाठी डॅशबोर्डवर प्रदर्शित करता येतील
१५ दिवसांत प्रतिसाद न मिळाल्यास महापालिका सिपीडी (CPD) मार्फत खरेदी करू शकेल
या उपक्रमामुळे बीएमसीची दरवर्षी ५०० ते १,००० कोटी रुपयांची बचत होऊ शकते
मुंबई : मुंबई महानगरपालिकेच्या कामकाजात नागरिक आणि दानशूर संस्थांचा अधिक सहभाग वाढवण्यासाठी नवा उपक्रम राबवण्याचा प्रस्ताव समोर आला आहे. मुंबई भाजप अध्यक्ष आणि आमदार अमित साटम यांनी महापौर रितू तावडे आणि महापालिका आयुक्त भूषण गगराणी यांना पत्र लिहून बीएमसीच्या संकेतस्थळावर स्वतंत्र CSR डॅशबोर्ड सुरू करण्याची मागणी केली आहे.
या प्लॅटफॉर्मच्या माध्यमातून दानशूर संस्था तसेच इच्छुक नागरिकांना सार्वजनिक कामांसाठी थेट योगदान देण्याची संधी मिळेल, असे साटम यांनी आपल्या पत्रात नमूद केले आहे. सध्या शालेय साहित्य, रुग्णालयीन उपकरणे, वॉटर कूलर यांसारख्या विविध वस्तू महापालिकेच्या मध्यवर्ती खरेदी विभागामार्फत खरेदी केल्या जातात. यासाठी निविदा प्रक्रिया राबवली जाते.
निविदा प्रक्रिया त्वरित सुरू करण्याऐवजी, अशा सर्व गरजा प्रथम CSR डॅशबोर्डवर १५ दिवसांसाठी प्रदर्शित केल्या जाव्यात. यामुळे दानशूर संस्था आणि इच्छुक नागरिकांना योगदान देण्याची एक संधी मिळेल. कोणत्याही नव्या गरजेची नोंद प्रथम या डॅशबोर्डवर करावी आणि १५ दिवसांत प्रतिसाद न मिळाल्यासच CPD कडून खरेदी प्रक्रिया सुरू करावी, असे आमदार अमीत साटम यांनी सांगितले.
मुंबईत अनेक धर्मादाय आणि परोपकारी संस्था आहेत ज्या सार्वजनिक उद्देशांसाठी मदत करण्यास इच्छुक आहेत. मात्र योगदान कसे द्यावे याची माहिती त्यांना नसते. असा प्लॅटफॉर्म उपलब्ध झाल्यास ते आनंदाने महापालिकेच्या विविध गरजांसाठी मदत करतील, असेही आमदार अमीत साटम यांनी नमूद केले.
अशा प्रकारची व्यवस्था सुरू केल्यास महापालिका दरवर्षी अंदाजे ५०० ते १,००० कोटी रुपयांपर्यंत पैसे वाचवू शकेल. तसेच शहराच्या विकासामध्ये नागरिकांचा अधिक सहभागही वाढेल, असे आमदार अमीत साटम यांनी सांगितले.