मुंबई : शिर्डी जवळील लोणी येथे १३ वर्षीय शालेय विद्यार्थिनीवर झालेल्या अॅसिड हल्ल्याच्या घटनेने राज्य हादरले असून, याचे तीव्र पडसाद बुधवारी विधिमंडळात उमटले. या संतापजनक कृत्यातील आरोपीला कोणत्याही परिस्थितीत सोडले जाणार नाही, त्याला कठोरातील कठोर शासन केले जाईल, अशी ग्वाही जिल्ह्याचे पालकमंत्री राधाकृष्ण विखे-पाटील यांनी दिली आहे. दरम्यान, पीडित मुलीला 'मनोधैर्य' योजनेतून तातडीने आर्थिक मदत देण्याचे निर्देशही प्रशासनाला देण्यात आले आहेत.
लोणी परिसरात शाळेत जाणाऱ्या चिमुकलीवर भररस्त्यात अॅसिड फेकून आरोपी पसार झाला. या घटनेनंतर परिसरात दहशतीचे वातावरण असून राजकीय वर्तुळातूनही संतप्त प्रतिक्रिया उमटत आहेत. या प्रकरणावर भाष्य करताना अहिल्यानगरचे पालकमंत्री राधाकृष्ण विखे-पाटील म्हणाले की, "ही घटना अत्यंत निंदनीय आहे. ग्रामीण भाग असल्याने घटनास्थळी सीसीटीव्ही कॅमेरे नाहीत, मात्र प्राथमिक अंदाजानुसार आरोपी स्थानिकच असण्याची शक्यता आहे. पोलिसांचा तपास जलद गतीने सुरू असून आज सायंकाळपर्यंत आरोपीला अटक केली जाईल. अशा गुन्हेगारांवर कठोर कारवाई व्हायलाच हवी, हे माझे वैयक्तिक मत आहे."
पीडितेवर उपचार सुरू
महिला व बालविकास मंत्री आदिती तटकरे यांनी या घटनेवर बारकाईने लक्ष ठेवून असल्याचे सांगितले. "पीडित मुलगी आणि तिचे कुटुंबीय सध्या प्रचंड धक्क्यात आहेत. तिच्यावर लोणी येथे उपचार सुरू असून, तिची प्रकृती स्थिर झाल्यानंतर तिची चौकशी केली जाईल. शासनाच्या 'मनोधैर्य' योजनेतून तिला तात्काळ आर्थिक सहाय्य देण्याबाबतचा प्रस्ताव मागवण्यात आला आहे," असे तटकरे यांनी स्पष्ट केले.