इंडियन प्रीमियर लीग (आयपीएल) २०२६ च्या आधी, सनरायझर्स हैदराबादने एक मोठा निर्णय घेतला आहे. भारताच्या नुकत्याच झालेल्या टी-२० विश्वचषक विजयात महत्त्वाची भूमिका बजावणारा युवा फलंदाज ईशान किशनची संघाने कर्णधार म्हणून नियुक्ती केली आहे. त्यामुळे पॅट कमिन्सच्या जागी ईशान किशन संघाचं नेतृत्त्व करणार आहे. तर अभिषेख शर्मा यांची उपकर्णधार पदासाठी नियुक्ती करण्यात आली आहे.
दुखापतीमुळे पॅट कमिन्स हंगामातील सुरुवातीचे काही सामने खेळू शकणार नाही. तो परत येईपर्यंत ईशान किशन संघाचं नेतृत्व करणार आहे.
सनरायझर्स हैदराबाद फ्रँचायझीने आपल्या इंस्टाग्राम अकाउंटवर पोस्ट केले, "पॅट कमिन्स दुखापतीतून सावरत आहे आणि हंगामाच्या सुरुवातीच्या सामन्यांमध्ये खेळू शकणार नाही. तो बरा होईपर्यंत, ईशान किशन संघाचे नेतृत्व करेल आणि अभिषेक शर्मा उपकर्णधार असेल. ईशानने या हंगामात झारखंडला सय्यद मुश्ताक अली ट्रॉफी जिंकून दिली. त्याने संपूर्ण हंगामात दमदार खेळ केला आणि याच कामगिरीमुळे त्याचे भारतीय संघात पुनरागमन झाले. ईशान गेल्या वर्षीच हैदराबाद संघात सामील झाला आणि त्याने आपल्या स्फोटक फलंदाजीने साऱ्यांचेच लक्ष वेधून घेतले होते. पुन्हा एकदा सर्वांच्या नजरा त्याच्यावर असणार आहेत.
हैदराबाद संघाने २०१६ मध्ये डेव्हिड वॉर्नरच्या नेतृत्वाखाली आपले पहिले विजेतेपद पटकावले होते. २०२४ मध्ये, पॅट कमिन्सच्या नेतृत्वाखाली संघ अंतिम फेरीत पोहोचला होता. पण कोलकाता नाईट रायडर्सकडून पराभूत झाला. कमिन्सच्या नेतृत्वाखाली हैदराबादने अपवादात्मक कामगिरी केली आहे. हा संघ अत्यंत आक्रमक असून आपल्या स्फोटक फलंदाजीसाठी ओळखला जातो, ज्यामध्ये अभिषेक शर्मा, ईशान किशन, हेनरिक क्लासेन, नितीश कुमार रेड्डी यांसारखे स्फोटक फलंदाज आहेत.