- सुरक्षा यंत्रणा अलर्ट मोडवर
मुंबई : मुंबईत एक धक्कादायक प्रकार समोर आला असून मुंबई प्रेस क्लबला (Mumbai Press Club) धमकीचा ईमेल मिळाला आहे. या ईमेलमध्ये क्लबच्या आवारात गॅस बॉम्ब ठेवल्याचा दावा करण्यात आला असून दुपारी १ वाजता स्फोट घडवण्याची धमकी देण्यात आली होती.
घटनेची माहिती मिळताच मुंबई पोलीस तात्काळ घटनास्थळी दाखल झाले. बॉम्ब शोध व नाशक पथक (BDDS) तसेच श्वान पथकांना तैनात करून संपूर्ण परिसरात सखोल तपासणी मोहीम राबवण्यात येत आहे. सुरक्षेच्या दृष्टीने परिसरातील हालचालींवरही लक्ष ठेवण्यात येत आहे.
प्राथमिक तपासात हा ईमेल “नीरजा अजमल खान” या नावाने पाठवण्यात आल्याचे समोर आले आहे. संबंधित व्यक्तीने ईमेलमध्ये काही राजकीय दावेही केले असल्याची माहिती पोलिसांनी दिली.
दरम्यान, सायबर पथकांनी या प्रकरणाचा तपास सुरू केला असून प्रोटॉन मेलद्वारे पाठवलेल्या ईमेलचा माग काढण्याचे प्रयत्न सुरू आहेत. सध्या कोणताही स्फोटक पदार्थ आढळून आलेला नसला तरी पोलीस अधिक सतर्कता बाळगत आहेत.