इराणच्या हल्ल्यात नुकसान झाल्याची जाणीव होताच कुवेत सरकारने घटनास्थळी तातडीने मदतकार्य सुरू केले आहे. वीज आणि पाणी शुद्धीकरण प्रकल्पाचे विस्कळीत झालेले कामकाज पुन्हा सुरळीत करण्यासाठी युद्ध पातळीवर प्रयत्न सुरू आहेत.
कुवेतच्या राजाच्या प्रशासनाने नागरिकांना शांत राहा, अफवा पसरवू नका, पुढील सूचना मिळेपर्यंत घरात थांबा, दारं खिडक्या बंद ठेवा असे खबरदारीचे निर्देश दिले आहेत. अफवा पसरवणाऱ्यांविरोधात कठोर कारवाई करणार असल्याचेही प्रशासनाने जाहीर केले आहे.
वीज आणि शुद्ध पाणी यांच्या पुरवठ्यात बाधा येऊ नये यासाठी कुवेतने एक आपत्कालीन योजना कार्यान्वीत केली आहे. लवकरच परिस्थिती पूर्ण नियंत्रणात असेल, असे कुवेतच्या राजाच्या प्रशासनाने जाहीर केले आहे.
दक्षिण लेबनॉनमधील अदचित अल कुसैरजवळ युनिफिलच्या (UNIFIL) तळावर एक क्षेपणास्त्र आदळल्याने संयुक्त राष्ट्राचा एक शांतता सैनिक ठार झाला आणि एक शांतता सैनिक जखमी झाला आहे. युनिफिलने हल्ल्यात हुतात्मा झालेल्या सैनिकाचे पार्थिव त्याच्या घरी पोहोचवण्याचे नियोजन सुरू असल्याचे सांगितले. तसेच घडलेल्या घटनेविषयी दुःख व्यक्त केले आहे. जखमी सैनिकावर रुग्णालयात उपचार सुरू आहेत. जखमी सैनिकाला आवश्यक ती सर्व मदत पुरवली जात असल्याचे युनिफिलने सांगितले.
सर्वांनी आंतरराष्ट्रीय नियम आणि संकेतांचे पालन करावे. शांतता सैनिकांवरील हल्ला हा आंतरराष्ट्रीय गुन्हा आहे. हा गुन्हा करणे टाळा असे आवाहन युनिफिलने केले आहे. याआधी इस्रायलने दक्षिण लेबनॉनमध्ये हिजबुल्लाहच्या दहशतवाद्यांना ठार करण्यासाठी हल्ले करत असल्याचे जाहीर केले. हिजबुल्लाहच्या स्फोटकांचा मोठा साठा सापडल्याचेही इस्रायलने जाहीर केले.