- सामाजिक कार्यकर्त्या तृप्ती देसाई यांचा खळबळजनक आरोप
मुंबई : महिलांच्या लैंगिक शोषणाचे आरोप असलेल्या भोंदू अशोक खरात प्रकरणाची व्याप्ती दिवसेंदिवस वाढत आहे. आता या प्रकरणात आता विधान परिषदेच्या उपसभापती आणि शिवसेना नेत्या नीलम गोऱ्हे यांचे नाव ओढले गेल्याने खळबळ उडाली आहे. "मंत्रिपद मिळवण्यासाठी आणि भविष्य जाणून घेण्यासाठी नीलम गोऱ्हे या खरातच्या संपर्कात होत्या," असा गंभीर आरोप सामाजिक कार्यकर्त्या तृप्ती देसाई यांनी केला आहे.
महिलांच्या प्रश्नांवर आक्रमक भूमिका घेणाऱ्या नीलम गोऱ्हे या प्रकरणावर अद्याप शांत का, असा सवाल देसाई यांनी उपस्थित केला. "शंभरहून अधिक महिलांच्या शोषणाचे व्हिडिओ समोर आले आहेत, पोलीस तपास करत आहेत. अशा वेळी प्रत्येक लहान मुद्द्यावर प्रसिद्धीपत्रक काढणाऱ्या नीलमताईंनी उपसभापती असूनही यावर अवाक्षरही काढले नाही. खरात जरी परिचयाचा असला, तरी त्याचे काळे कारनामे समोर आल्यावर त्यांनी आवाज उठवायला हवा होता," अशी टीका देसाई यांनी केली.