मुंबई : अमरावती शहरातील क्रीडाप्रेमींसाठी आनंदाची बातमी! मुख्यमंत्री देवेंद्र फडणवीस यांच्या अध्यक्षतेखाली आज झालेल्या राज्य मंत्रिमंडळाच्या बैठकीत अमरावतीलगतच्या नवसारी येथे १६,७०८ चौ. मी. जागा क्रीडा संकुलासाठी अमरावती महानगरपालिकेला विनामूल्य देण्याचा निर्णय राज्य शासनाने घेतला आहे. महसूलमंत्री व अमरावतीचे पालकमंत्री चंद्रशेखर बावनकुळे यांच्या पुढाकाराने हा निर्णय घेतला.
या जागेवर विकास योजनेअंतर्गत 'खेळाचे मैदान' असे आरक्षण होते आणि त्याचा आगाऊ ताबा महापालिकेला देण्यात आला होता. मात्र, महापालिकेने या जागेवर पूर्वपरवानगीशिवाय त्रयस्थांसोबत करार करून क्रीडा संकुल विकसित केले आणि काही क्षेत्रावर (१८७८.८० चौ.मी.) वाणिज्य वापर सुरू केला होता. या शर्तभंगामुळे शासनाच्या नियमांनुसार या जागेचे अकृषिक दराने होणारे मूल्यांकन १० कोटी ९० लाख १९ हजार ७०० रुपये आणि २०११ पासूनच्या वाणिज्य वापरापोटीचे व्याज ३ कोटी ५६ लाख २१ हजार ८६२ रुपये, अशी एकूण १४ कोटी ४६ लाख ४१ हजार ५६२ रुपयांची रक्कम शासनाकडे जमा करण्याचे आदेश देण्यात आले होते.
परंतु, अमरावती महानगरपालिकेची सध्याची आर्थिक स्थिती बेताची असून, कर्मचाऱ्यांची देणी व कंत्राटदारांची थकीत देयके असे जवळपास ३५० कोटींचे दायित्व महापालिकेवर आहे. महापालिकेच्या स्वउत्पन्नातून एवढी मोठी रक्कम भरणे शक्य नसल्याचे महापालिका आयुक्तांनी शासनाला कळवले होते. याबाबत महसूलमंत्री चंद्रशेखर बावनकुळे यांनी देखील पाठपुरावा करुन पालिकेसाठी हे मैदान उपलब्ध करुन देण्याचा मार्ग मोकळा करून दिला.
* नवसारी (जि. अमरावती) येथील सर्व्हे नं. २९ मधील १६,७०८ चौ.मी. जागा आता क्रीडा संकुलासाठी महापालिकेला विनामूल्य हस्तांतरित केली जाईल.
* वाणिज्य वापरामुळे आकारण्यात आलेले ३ कोटी ५६ लाख रुपयांचे व्याज पूर्णपणे माफ करण्यात आले आहे.
* सदर आरक्षणास नगर विकास विभागाची मान्यता प्राप्त होण्याच्या अधीन राहून ही जागा महापालिकेला प्रदान करण्यात येईल.
शासनाच्या या सकारात्मक निर्णयामुळे अमरावती महानगरपालिकेवरील मोठा आर्थिक भार हलका झाला असून, शहरातील खेळाडूंसाठी हक्काचे 'क्रीडा संकुल' उभे राहण्यास मोठी मदत मिळणार आहे.
.............
अमरावती शहरासाठी क्रीडांगण ही आवश्यक बाब होती. या ठिकाणी तयार झालेले अनेक खेळाडू देश आणि जगभरात लौकिक मिळवत आहेत. त्यामुळे सामाजिक हित आणि खेळाडूंची गरज लक्षात घेऊन या क्रीडांगणासाठी शासकीय जागा महापालिकेस विनामूल्य देण्यात येत आहे. : चंद्रशेखर बावनकुळे, महसूलमंत्री व पालकमंत्री, अमरावती