- पाकिस्तानच्या ‘मिशन सी सुल्तान’मुळे समुद्रात तणाव वाढणार?
युद्धसदृश परिस्थितीत पाकिस्तानने भारतीय नौदलाविरुद्ध मोठी रणनीती आखत ‘मिशन सी सुल्तान’ सुरू केलं आहे. या मिशनअंतर्गत पाकिस्तानी नौदलाने लाँग रेंज मेरीटाइम पेट्रोल एअरक्राफ्ट (LRMP) आपल्या ताफ्यात दाखल केल्याने अरबी समुद्रातील हालचालींवर अधिक बारीक नजर ठेवण्याची क्षमता वाढली आहे. यामुळे भारतीय पाणबुड्यांसाठी संभाव्य धोका निर्माण होण्याची शक्यता व्यक्त केली जात आहे.
पाकिस्तानी नौदल प्रमुख ॲडमिरल नवीद अशरफ यांनी या नव्या क्षमतेची अधिकृत पुष्टी करत, हे पाऊल नौदलाच्या आधुनिकीकरणाचा भाग असल्याचं सांगितलं. समुद्रात शत्रूच्या पाणबुड्या शोधणे, त्यांच्यावर कारवाई करणे आणि लांब पल्ल्याच्या ऑपरेशन्ससाठी अशी गस्ती विमानं अत्यंत महत्त्वाची मानली जातात.
‘सी सुल्तान’मागचा उद्देश काय?
या प्रकल्पात एम्ब्रेयर लाइनएज 1000E या बिजनेस जेटवर आधारित विशेष गस्ती विमानांचा समावेश करण्यात आला आहे, ज्यांना लष्करी ऑपरेशन्ससाठी सुसज्ज करण्यात आलं आहे.
पाक नौदलाचा वाढता फोकस :
पाकिस्तानी नौदल केवळ गस्ती विमानांपुरतं मर्यादित न राहता, फ्रिगेट्स, कार्वेट्स आणि पाणबुड्यांच्या ताफ्यातही वाढ करत आहे. याशिवाय सायबर वॉरफेयर, आर्टिफिशियल इंटेलिजन्स आणि स्पेस टेक्नोलॉजीचा वापर वाढवण्यावरही भर दिला जात आहे.
त्यामुळे टेहळणी, पाणबुडीविरोधी कारवाई (Anti-Submarine Warfare) आणि दूरवर ऑपरेशन करण्याची क्षमता वाढवण्याचा पाकिस्तानचा प्रयत्न दिसून येतो.
भारताकडे कोणती ताकद?
दुसरीकडे, भारतीय नौदलही हिंद महासागरात आपली ताकद सातत्याने वाढवत आहे.
- P-8I Poseidon: Boeing P-8I Poseidon हे अत्याधुनिक गस्ती विमान पाणबुडी शोधणे आणि लांब पल्ल्याच्या टेहळणीसाठी प्रसिद्ध आहे.
- MH-60R Romeo हेलिकॉप्टर: MH-60R Seahawk ही हेलिकॉप्टर्स खोल समुद्रातील शत्रूच्या पाणबुड्यांचा शोध घेऊन त्यांना निष्प्रभ करण्यास सक्षम आहेत.
-आयएनएस माहे, आयएनएस अर्नाळा आणि आयएनएस आन्द्रोतसारख्या युद्धनौकांद्वारे भारताची पाणबुडीविरोधी क्षमता अधिक मजबूत केली जात आहे.