मुंबई : देशातील आघाडीची कार उत्पादक कंपनी मारुती सुझुकीने मार्च 2026 महिन्यात विक्रीत उल्लेखनीय वाढ नोंदवली आहे. कंपनीने दिलेल्या माहितीनुसार, मार्च 2026 मध्ये एकूण 2,25,251 युनिट्सची विक्री झाली असून, मागील वर्षी याच कालावधीत झालेल्या 1,92,984 युनिट्सच्या तुलनेत ही तब्बल 16.72 टक्क्यांनी अधिक आहे. त्यामुळे कंपनीच्या विक्रीत सातत्याने वाढ होत असल्याचे स्पष्ट झाले आहे.
देशांतर्गत विक्रीबाबतही कंपनीने चांगली कामगिरी केली आहे. मार्च 2026 मध्ये कंपनीची देशांतर्गत विक्री 1,69,428 युनिट्स इतकी झाली असून, मार्च 2025 मधील 1,53,134 युनिट्सच्या तुलनेत यात 10.64 टक्क्यांची वाढ झाली आहे. ही वाढ भारतीय बाजारपेठेत कंपनीच्या मजबूत उपस्थितीचे द्योतक मानली जात आहे.
वित्त वर्ष 2025-26 साठीही कंपनीची कामगिरी सकारात्मक राहिली आहे. 31 मार्च 2026 रोजी संपलेल्या आर्थिक वर्षात मारुती सुझुकीने एकूण 24,22,713 युनिट्सची विक्री केली आहे. हे प्रमाण वित्त वर्ष 2024-25 मधील 22,34,266 युनिट्सच्या तुलनेत 8.4 टक्क्यांनी अधिक आहे. याशिवाय, देशांतर्गत विक्रीतही वाढ झाली असून, ती 3.8 टक्क्यांनी वाढून 19,74,939 युनिट्सपर्यंत पोहोचली आहे.
कंपनीच्या विविध सेगमेंट्समध्येही मिश्र चित्र पाहायला मिळाले आहे. मिनी सेगमेंटमध्ये अल्टो आणिएस-प्रेसो या कार्सचा समावेश असून, मार्च 2026 मध्ये या सेगमेंटमध्ये 11,741 युनिट्सची विक्री झाली आहे. ही विक्री मार्च 2025 मधील 11,655 युनिट्सच्या तुलनेत केवळ 0.7 टक्क्यांनी वाढली आहे. मात्र, संपूर्ण वित्त वर्षात या सेगमेंटमध्ये घसरण दिसून आली आहे. वित्त वर्ष 2025-26 मध्ये 1,12,291 युनिट्सची विक्री झाली असून, मागील वर्षाच्या 1,25,770 युनिट्सच्या तुलनेत ही 10.71 टक्क्यांनी कमी आहे.
कॉम्पॅक्ट सेगमेंटमध्ये मात्र कंपनीने चांगली प्रगती केली आहे. इग्निस,बालेनो, सेलेरियो, डिझायर, स्विफ्ट आणि वॅगनआर या लोकप्रिय मॉडेल्समुळे मार्च 2026 मध्ये या सेगमेंटची विक्री 71,789 युनिट्सवर पोहोचली आहे. ही विक्री मार्च 2025 मधील 61,097 युनिट्सच्या तुलनेत 17.5 टक्क्यांनी अधिक आहे. वार्षिक स्तरावरही या सेगमेंटमध्ये 4.84 टक्क्यांची वाढ नोंदवली गेली असून, विक्रीचा आकडा 8,08,102 युनिट्सपर्यंत गेला आहे.
युटिलिटी व्हेईकल्स सेगमेंटमध्ये कंपनीने सर्वाधिक वाढ नोंदवली आहे. ब्रेझा, एर्टिगा, ग्रँड व्हिटारा, फ्रॉन्क्स, इनव्हिक्टो आणि एक्सएल६ यांसारख्या मॉडेल्समुळे मार्च 2026 मध्ये 71,356 युनिट्सची विक्री झाली आहे, जी मार्च 2025 मधील 61,097 युनिट्सच्या तुलनेत 16.7 टक्क्यांनी अधिक आहे. आर्थिक वर्षाच्या पातळीवरही या सेगमेंटमध्ये 5.67 टक्क्यांची वाढ झाली असून, विक्री 7,60,987 युनिट्सवर पोहोचली आहे.
याशिवाय, निर्यातीतही कंपनीने भक्कम कामगिरी केली आहे. मार्च 2026 मध्ये निर्यात 47,040 युनिट्सपर्यंत पोहोचली असून, मार्च 2025 मधील 32,968 युनिट्सच्या तुलनेत सुमारे 34 टक्क्यांची लक्षणीय वाढ झाली आहे.
एकूणच, मारुती सुझुकीसाठी मार्च 2026 आणि संपूर्ण वित्त वर्ष 2025-26 हे विक्रीच्या दृष्टीने सकारात्मक ठरले असून, विविध सेगमेंटमध्ये वाढती मागणी आणि निर्यातीत झालेली वाढ ही कंपनीसाठी भविष्यातील मजबूत संकेत मानली जात आहे.