मुंबई: अजित पवार यांच्या निधनामुळे रिक्त झालेल्या बारामती विधानसभा मतदारसंघाच्या पोटनिवडणुकीत अखेर राजकीय संघर्षाची ठिणगी पडली आहे. ही निवडणूक बिनविरोध व्हावी, यासाठी महायुतीने शेवटपर्यंत प्रयत्न केले असले, तरी काँग्रेसने आपला उमेदवार रिंगणात उतरवत थेट आव्हान देण्याचे निश्चित केले आहे. काँग्रेसचे राष्ट्रीय अध्यक्ष मल्लिकार्जुन खरगे यांनी बारामतीसाठी आकाश विश्वनाथ मोरे यांच्या उमेदवारीवर शिक्कामोर्तब केले असून, यामुळे आता सुनेत्रा पवार विरुद्ध आकाश मोरे असा अधिकृत सामना रंगणार आहे.
बारामती हा पवार कुटुंबाचा अभेद्य गड मानला जातो. अजित पवार यांच्या निधनानंतर ही पोटनिवडणूक बिनविरोध करण्यासाठी महायुतीतील घटक पक्षांनी मोर्चेबांधणी केली होती. मात्र, काँग्रेसने उमेदवार देण्याचा निर्णय घेतला. काँग्रेसचे प्रदेशाध्यक्ष हर्षवर्धन सपकाळ यांच्या उपस्थितीत सोमवारी सकाळी ११ वाजता आकाश मोरे आपला उमेदवारी अर्ज दाखल करणार आहेत.