पुणे : पुण्यातील निसर्गरम्य पाषाण तलावात (Pashan Lake) मोठ्या प्रमाणावर मासे आणि जलचरांचा मृत्यू झाल्याची भयानक घटना समोर आली आहे. पुणे महापालिका प्रशासनाने कठोर पावले उचलली आहेत. या गंभीर प्रकरणाची दखल घेत आयुक्तांनी कर्तव्यात कसूर करणाऱ्या चार अधिकाऱ्यांना तातडीने निलंबित केले आहे. केवळ निलंबनावरच न थांबता, मुख्य अभियंत्यालाही याप्रकरणी 'कारणे दाखवा' नोटीस बजावण्यात आली आहे. महापालिकेच्या या 'अ‍ॅक्शन मोड'मुळे संपूर्ण पालिका वर्तुळात प्रचंड खळबळ उडाली असून, पर्यावरण रक्षणाबाबत हलगर्जीपणा करणाऱ्यांचे धाबे दणाणले आहेत.
विषारी सांडपाण्यामुळेच पाषाण तलावातील जलचरांचा अंत
पाषाण तलावात हजारो मासे अचानक का मरू लागले, या प्रश्नाचे उत्तर अखेर समोर आले आहे. १५ व्या वित्त आयोगाच्या निधीतून तलावाजवळ १ एमएलडी क्षमतेचा मैलापाणी प्रक्रिया प्रकल्प (STP) उभारण्यात आला होता. मात्र, प्रशासकीय तपासात असा धक्कादायक खुलासा झाला आहे की, हा प्रकल्प केवळ कागदावर किंवा नावापुरता सुरू होता. प्रत्यक्षात, कोणतीही प्रक्रिया न करता मैलापाणी थेट तलावाच्या पात्रात सोडले जात होते. या विषारी सांडपाण्यामुळे तलावातील ऑक्सिजनच्या पातळीत मोठी घट झाली आणि जलचरांचा श्वास गुदमरून त्यांचा मृत्यू झाला. या निष्काळजीपणामुळे केवळ पर्यावरणाची हानी झाली नाही, तर संपूर्ण परिसरातील सार्वजनिक आरोग्यही धोक्यात आले आहे.