गुवाहाटी : राजस्थान रॉयल्स आणि रॉयल चॅलेंजर्स बंगळुरू यांच्यात शुक्रवार १० एप्रिल रोजी झालेला सामना राजस्थानने सहा विकेट राखून जिंकला. या सामन्यात वैभव सूर्यवंशीने २६ चेंडूत ७८ धावा केल्या. या खेळीसाठी त्याला सामनावीर पुरस्काराने गौरविण्यात आले. याच सामन्यावेळी घडलेल्या एका घटनेची बीसीसीआय चौकशी करणार आहे.
सामना सुरू असताना डगआऊटमध्ये वैभव सूर्यवंशीच्या शेजारी बसलेला टीमचा व्यवस्थापक (टीम मॅनेजर) रोमी भिंदर मोबाईल वापरत असल्याचे दिसत आहे. या घटनेचा व्हिडीओ व्हायरल होत आहे. भिंदरची कृती ही आयपीएलसाठीच्या खेळाडू आणि सामना अधिकारी क्षेत्राशी संबंधित नियमांचे उल्लंघन असल्याचा आरोप होत आहे. या प्रकरणात चौकशी करून दोषी आढळल्यास नियमानुसार कारवाई केली जाईल, असे बीसीसीआयचे सचिव देवजीत सैकिया यांनी सांगितले.
टीमच्या व्यवस्थापकाला मोबाईल सोबत बाळगण्याची परवानगी आहे. पण डगआऊटमध्ये मोबाईलचा वापर नेमक्या कोणत्या कामासाठी झाला याचा तपास करावा लागेल. एखाद्या नियमाचे उल्लंघन झाले असल्यास कारवाई केली जाईल, असे बीसीसीआयकडून सांगण्यात आले आहे.
चौकशीअंती दोषीवर काय कारवाई करावी याचा निर्णय सामनाधिकारी आणि आयपीएलचे भ्रष्टाचार विरोधी पथक यांच्या अहवालांवर अवलंबून आहे. पण डगआऊटमध्ये मोबाईलला बंदी आहे. व्यवस्थापकाने तिथे मोबाईल का नेला होता आणि त्याच्याकडून घडलेली कृती ही नियमाचे उल्लंघन आहे का हे चौकशी अहवालांवर अवलंबून असल्याचे बीसीसीआयचे सचिव देवजीत सैकिया म्हणाले.
राजस्थान रॉयल्सची टीम धावांचा पाठलाग करत होती त्यावेळी मोबाईलच्या वापराची घटना घडली आहे. शिवाय एक प्रतिक्रिया देताना वैभव सूर्यवंशीने भिंदर हा आपला एक मार्गदर्शक असल्याचे सांगितले आहे. वैभवच्या या वक्तव्याचा अर्थ तपासण्याचे काम सुरू असल्याची माहिती बीसीसीआयचे सचिव देवजीत सैकिया यांनी दिली.
आयपीएल २०२६ मध्ये राजस्थान रॉयल्सचे आतापर्यंत चार सामने खेळून झाले आहेत. या सर्व सामन्यांमध्ये विजय मिळाल्यामुळे गुणतक्त्यात राजस्थान रॉयल्सची टीम आठ गुणांसह अव्वलस्थानी आहे.