मुंबई : मध्य रेल्वे, मुंबई विभागात रविवार २६ एप्रिल २०२६ रोजी विविध अभियांत्रिकी, देखभाल कामांसाठी छत्रपती शिवाजी महाराज टर्मिनस आणि चुनाभट्टी / वांद्रे विभागांदरम्यानच्या हार्बर मार्गावर मेगाब्लॉक घेण्यात येणार आहे. छत्रपती शिवाजी महाराज टर्मिनस – चुनाभट्टी / वांद्रे डाउन हार्बर मार्गांवर सकाळी ११.४० ते सायंकाळी ४.४० वाजेपर्यंत आणि चुनाभट्टी / वांद्रे – छत्रपती शिवाजी महाराज टर्मिनस अप हार्बर मार्गांवर सकाळी ११.१० ते सायंकाळी ४.१० वाजेपर्यंत मेगाब्लॉक आहे. यामुळे छत्रपती शिवाजी महाराज टर्मिनस येथून सकाळी ११.१६ ते सायंकाळी ४.४७ वाजेपर्यंत सुटणाऱ्या तसेच वाशी / बेलापूर / पनवेल येथे जाणाऱ्या डाउन हार्बर मार्गावरील सेवा आणि छत्रपती शिवाजी महाराज टर्मिनस येथून सकाळी १०.४८ ते सायंकाळी ४.४३ पर्यंत सुटणाऱ्या व वांद्रे / गोरेगाव येथे जाणाऱ्या डाउन हार्बर मार्ग सेवा रद्द राहतील.
मेगाब्लॉक असल्यामुळे पनवेल/बेलापूर/वाशी येथून सकाळी ९.५३ ते दुपारी ३.२० पर्यंत सुटणारी छत्रपती शिवाजी महाराज टर्मिनस साठीची अप हार्बर मार्गांवरील सेवा आणि गोरेगाव/वांद्रे येथून सकाळी १०.४५ ते सायंकाळी ५.१३ पर्यंत सुटणारी छत्रपती शिवाजी महाराज टर्मिनस साठीची अप हार्बर मार्गांवरील सेवा रद्द राहतील. ब्लॉक कालावधीत पनवेल आणि कुर्ला (प्लॅटफॉर्म क्र. ८) दरम्यान दर २० मिनिटांनी विशेष सेवा चालविण्यात येतील. ब्लॉक कालावधीत हार्बर मार्गाच्या प्रवाशांना सकाळी १०.०० ते सायंकाळी ६.०० पर्यंत मेन लाईन आणि पश्चिम रेल्वेमार्गे प्रवास करण्याची परवानगी देण्यात आली आहे.
मध्य रेल्वेच्या मेन लाईनवर छत्रपती शिवाजी महाराज टर्मिनस- कल्याण सेक्शनवर रविवार २६ एप्रिल २०२६ रोजी मेगाब्लॉक नाही.