मुंबई : महानगरपालिकेच्या के.ई.एम. हॉस्पिटल येथे शुक्रवारी सकाळी घटनेत घटनेत 27 वर्षीय एका रुग्णाने आत्महत्येचा प्रयत्न केला असून त्यामध्ये त्याचा दुर्दैवी मृत्यू झाला आहे. या घडलेल्या अत्यंत दुर्दैवी घटनेच्या पार्श्वभूमीवर सार्वजनिक आरोग्य समिति अध्यक्ष हरिष भांदिर्गे यांनी तात्काळ रुग्णालयाला भेट देऊन सविस्तर पाहणी केली.सुरक्षेच्या दृष्टीकोनातून तात्काळ काही महत्त्वाचे निर्णय घेण्यात आले असून, या प्रकरणात जे कोणी दोषी आढळतील किंवा ज्यांनी आपल्या कर्तव्यात कसूर केली असेल, त्यांच्यावर तातडीने कडक कारवाई करण्यात येणार असल्याचे स्पष्ट निर्देश देण्यात आले.
सार्वजनिक आरोग्य समिति अध्यक्ष हरिष भांदिर्गे यांनी केईएम रुग्णालयात भेट देऊन त्या दुर्घटना स्थळाची पाहणी केली. यावेळी त्यांनी रुग्णालय प्रशासनास कठोर शब्दांत जाब विचारला. रुग्ण आत्महत्या करण्याच्या परिस्थितीत कसा गेला?सुरक्षा व्यवस्थेत कुठे त्रुटी राहिल्या?, तसेच रुग्णाच्या कुटुंबीयांवर याचा काय परिणाम झाला अशी प्रश्नांची सरबती करत प्रशासनाच्या कार्यपद्धतीवर नाराजी व्यक्त केली.
या पाहणीवेळी संबंधित रुग्णालय अधिष्ठाता डॉक्टर संगीता रावत , डॉक्टर, नर्सिंग स्टाफ व प्रशासनातील अधिकारी उपस्थित होते. सर्व संबंधितांसोबत सविस्तर चर्चा करून भविष्यात अशा घटना टाळण्यासाठी आवश्यक उपाययोजनांबाबत निर्देश देण्यात आले.
तसेच, संबंधित पोलीस स्टेशनमध्ये दाखल झालेल्या गुन्ह्याच्या अनुषंगाने पोलिसांना निष्पक्ष तपास करून लवकरात लवकर अहवाल सादर करण्याचे निर्देश देण्यात आले आहेत. या घटनेशी संबंधित सीसीटीव्ही फुटेजही तात्काळ मागवण्यात आले असून त्याचा तपासात उपयोग केला जाणार आहे.
मुंबई महानगरपालिका प्रशासन रुग्णांच्या सुरक्षेबाबत पूर्णपणे कटिबद्ध असून भविष्यात अशा घटना होऊ नयेत यासाठी आवश्यक त्या सर्व उपाययोजना काटेकोरपणे राबवण्यात येतील, असे सार्वजनिक आरोग्य समिती अध्यक्ष हरिष भांदिर्गे यांनी स्पष्ट केले