मुंबई (विशेष प्रतिनिधी) : दक्षिण मुंबईतील कामाठीपुरा परिसरातील विविध ठिकाणांवरील सुमारे ७० अनधिकृत फेरीवाले व जुने भंगार विक्रेत्यांवर मुंबई महानगरपालिकेच्या ‘ई’ विभागाकडून मंगळवारी २८ एप्रिल २०२६ रोजी कारवाई करण्यात आली.
मुंबई महानगरपालिका उप आयुक्त (परिमंडळ-१) चंदा जाधव यांच्या मार्गदर्शनात, सहायक आयुक्त (ई विभाग) आनंद कंकाळ यांच्या नेतृत्वात ही कारवाई हाती घेण्यात आली होती. कामाठीपुरा गल्ली क्रमांक १ ते १५, शुक्लाजी स्ट्रिट, शंकर पुपाला मार्ग, सिद्धार्थ नगर, बाप्टी मार्ग येथील सुमारे ७० अनधिकृत फेरीवाले व जुने भंगार विक्रेत्यांचा या कारवाईत समावेश आहे. अतिक्रमण निर्मूलनाची ०५ वाहने, ०१ जेसीबी आणि अन्य संयंत्राच्या सहाय्याने हे निष्कासन करण्यात आले. या कारवाईदरम्यान महानगरपालिकेचे १५ अधिकारी-कर्मचारी यांच्यासह पुरेसा पोलिस बंदोबस्त नेमण्यात आला होता.