नागपूर : आज अनेक कुटुंबामध्ये संपत्तीचा वाद सर्रास पहायला मिळतो. या कारणातून अनेक हत्या आणि आत्महत्येच्या घटना घडल्या आहे. नागपूर शहरातून देखील अशीच एक खळबळजनक घटना समोर आली आहे. संपत्तीच्या वादातून माय-लेकीने आयुष्य संपवलं आहे. या घटनेमुळे नागपूर शहरात एकच खळबळ उडाली असून नात्यातील क्रूरता पुन्हा एकदा चव्हाट्यावर आली आहे. (Nagpur Crime )
नागपूर शहरातील नंदनवन पोलीस ठाण्याच्या हद्दीत ही घटना घडली आहे. संगीता ढबाले (आई) आणि आकांक्षा ब्रम्हे (मुलगी) अशी मृत महिलांची नावं आहेत. त्या दोघीही घरात एकत्र राहत होत्या. रात्रीच्या सुमारास या दोघींनीही आपल्या राहत्या घरातील लोखंडी अँगलला दोरी बांधून गळफास लावून आत्महत्या केली. पोलिसांना घटनास्थळी एक सुसाईड नोट सापडली असून, त्यामध्ये त्यांनी आपला अंत्यसंस्कार गावाकडे त्याच ठिकाणी करावेत जिथे आकांक्षाच्या वडिलांचा अंत्यसंस्कार झाले होते, अशी इच्छा व्यक्त केली आहे. तसेच, सुसाईड नोटमध्ये सासरच्या लोकांबद्दल असलेला तिरस्कार आणि दुःख स्पष्टपणे दिसून येत असून त्यांनी आपले पार्थिव सासरच्यांच्या ताब्यात न देण्याची विनंती केली आहे.
पोलिसांनी दिलेल्या प्राथमिक माहितीनुसार, आकांक्षा ब्रम्हेचा विवाह दोन वर्षांपूर्वी झाला होता. काही महिन्यांपूर्वीच तिला मुलगी झाली होती. मात्र, दुर्दैवाने त्या नवजात मुलीचा मृत्यू झाला. त्यानंतर आकांक्षा आपल्या आईच्या घरी राहायला आली होती. या काळात आकांक्षाचा पती लोकेश ब्रम्हे हा शेती, घर आणि इतर मालमत्तेसाठी आपली पत्नी आणि सासू यांच्याशी सातत्याने वाद घालत होता. आकांक्षा बँकेत नोकरी करत होती आणि तिची आई देखील नोकरीला होती, तर आकांक्षाच्या वडिलांचे 10 वर्षांपूर्वीच निधन झाले आहे. 30 एप्रिलच्या रात्री लोकेश त्यांच्या घरी आला होता आणि मालमत्तेच्या कारणावरून त्यांच्यात मोठा वाद झाला, ज्यामुळे मानसिक तणावाखाली येऊन माय-लेकीने दुकानातून दोरी आणली आणि मृत्यूला कवटाळले. (Nagpur Crime )
या आत्महत्येप्रकरणी नंदनवन पोलिसांनी अकस्मात मृत्यूची नोंद केली असून दोन्ही मृतदेह पोस्टमॉर्टेमसाठी पाठवले आहेत. नंदनवन पोलीस ठाण्याचे वरिष्ठ निरीक्षक कैलास देशमाने यांच्या मार्गदर्शनाखाली या प्रकरणाचा सखोल तपास सुरू आहे. प्राथमिक तपासात आणि सुसाईड नोटमधील मजकुरावरून पोलिसांना जावई लोकेश ब्रम्हे याच्यावरच आत्महत्येसाठी प्रवृत्त केल्याचा संशय आहे.
पोलिसांनी या प्रकरणातील सर्व तांत्रिक पुरावे आणि शेजाऱ्यांचे जबाब नोंदवण्यास सुरुवात केली आहे. मालमत्तेच्या वादातून एका हसत्या-खेळत्या कुटुंबाचा असा दुर्दैवी अंत झाल्याने हळहळ व्यक्त केली जात आहे. आरोपी लोकेशविरुद्ध गुन्हा दाखल करण्याची प्रक्रिया सुरू असून पोलीस लवकरच त्याला चौकशीसाठी ताब्यात घेण्याची शक्यता आहे.