कल्याण : मध्य रेल्वेच्या मुंबई मंडळाने कल्याण-बदलापूर दरम्यान १ ते ३ मेदरम्यान दोन रात्री विशेष पॉवर ब्लॉक जाहीर केला आहे. ओव्हरहेड उपकरणावरील अतिक्रमण हटवण्यासाठी हा ब्लॉक घेण्यात येणार आहे. शनिवारी २ मे रोजी पहाटे १.४० ते ३.४० या वेळेत कल्याण-अंबरनाथ दरम्यान, तर ३ मे रोजी १.३० ते ३.३० या वेळेत अंबरनाथ-बदलापूर दरम्यान ब्लॉक राहील. या कालावधीत कल्याण-बदलापूर दरम्यान उपनगरीय लोकल सेवा पूर्णपणे बंद राहणार आहे. तसेच काही मेल-एक्सप्रेस गाड्या कर्जत-पनवेल मार्गे वळवण्यात येणार असून काही गाड्यांना ठाणे व पनवेल येथे तात्पुरते थांबे देण्यात येणार आहेत. प्रवाशांनीर्यायी व्यवस्था करण्याचे आवाहन रेल्वे प्रशासनाने केले आहे.
२ मे च्या रात्री, ब्लॉकपूर्वीची शेवटची लोकल बीएल ६१ सीएसएमटी -बदलापूर धावेल, तर ब्लॉक नंतरची पहिली लोकल एस४ कर्जत-सीएसएमटी धावेल. त्याचप्रमाणे २ आणि ३ मे च्या रात्री शेवटची लोकल एस ४१ सीएसएमटी-कर्जत असेल आणि त्यानंतर एस४ कर्जत- सीएसएमटी ही पहिली लोकल सुरू होईल. या ब्लॉकमुळे लांब पल्ल्याच्या गाड्यांवरही परिणाम होणार आहे.
एक्सप्रेस गाड्या वळविणार : रेल्वे प्रशासनानुसार २ मे रोजी धावणारी भुवनेश्वर-सीएसएमटी कोणार्क एक्सप्रेस, विशाखापट्टणम-एलटीटी एक्सप्रेस आणि हैदराबाद-सीएसएमटी सेंसागर एक्सप्रेस या गाड्या कर्जत–पनवेल मार्गे वळविण्यात येणार आहेत. कल्याण येथे थांबा असलेल्या गाड्यांना प्रवाशांच्या सोयीसाठी पनवेल व ठाणे स्थानकांवर तात्पुरते थांबे देण्यात येणार आहेत. तसेच उशिराने धावणाऱ्या मेल, एक्सप्रेस व हॉलिडे स्पेशल गाड्यांमध्ये गरजेनुसार बदल किंवा वळवणूक केली जाऊ शकते, असेही रेल्वे प्रशासनाने स्पष्ट केले आहे.