छत्तीसगड : एकेकाळी नक्षलवाद्यांचा परिसर म्हणून ओळखल्या जाणाऱ्या भागात सुरुंग निकामी करण्याचे काम सुरू असताना स्फोट झाला. या स्फोटात डीआरजीचे चार जवान शहीद झाले.
कांकेर- नारायणपूर सीमावर्ती भागात शोध मोहीम आणि सुरुंग निर्मूलन मोहीम राबवली जात असताना, जमिनीत पुरलेल्या आयईडीचा (Improvised Explosive Device) स्फोट झाला. यामुळे आजूबाजूचा परिसर हादरला. स्फोटात डीआरजीचे चार जवान गंभीर जखमी झाले. स्फोटामुळे जवानांना झालेल्या जखमा अतिशय गंभीर स्वरुपाच्या होत्या. यामुळे जखमी जवानांना एअरलिफ्ट करून रुग्णालयात नेण्याचा निर्णय घेण्यात आला. पण हा प्रयत्न अयशस्वी झाला. रुग्णालयात जखमी जवानांनी प्राण सोडला.
गेल्या काही महिन्यांत अनेक नक्षलवाद्यांनी शरणागती पत्करली होती. या नक्षलवाद्यांकडून मिळालेल्या माहितीनुसार, बस्तरच्या जंगलात मोठ्या प्रमाणात स्फोटके आणि भूसुरुंग पेरून ठेवण्यात आले आहेत. ही स्फोटके शोधून ती निकामी करण्यासाठी जिल्हा पोलीस आणि डीआरजी जवानांची एक विशेष तुकडी छोटेबेठिया पोलीस ठाण्याच्या हद्दीत ‘डी-माइनिंग’ मोहीम राबवत होती. याच दरम्यान स्फोट झाला अन् भीषण स्फोटामुळे जवान गंभीर जखमी झाले. रुग्णालय लांब होते. यामुळे जखमी जवानांना एअरलिफ्ट करण्यात आले. पण तरीही रुग्णालयात पोहोचण्यास उशीर झाला. उपचार सुरू असताना गंभीर जखमी झालेल्या डीआरजीच्या चार जवानांचा मृत्यू झाला, असे बस्तर विभागाचे पोलीस महानिरीक्षक सुंदरराज पट्टिलिंगम यांनी सांगितले.
या दुःखद घटनेत डीआरजी प्रभारी सुखराम वट्टी, कॉन्स्टेबल कृष्ण कोमरा, कॉन्स्टेबल संजय गडपाले आणि कॉन्स्टेबल परमानंद कोरम हे जवान शहीद झाले आहेत. या घटनेनंतर अधिक खबरदारी घेऊन जमिनीत पुरलेली स्फोटके निकामी करण्याचे काम करण्याचा निर्णय झाला आहे.