शिर्डी : भोंदू अशोक खरातला ९ मे पर्यंत पोलीस कोठडीत ठेवण्याचे आदेश राहता न्यायालयाने दिले आहेत. आता शिर्डी पोलीस खरातची चौकशी करणार आहेत. खरात आणि त्याच्या पत्नीवर एका शेतकऱ्याची फसवणूक तसेच बेकायदा सावकारी केल्याप्रकरणी शिर्डी पोलिसांनी गंभीर गुन्हे दाखल केले आहेत.
मिळालेल्या माहितीनुसार, अशोक खरात आणि त्याच्या पत्नीने एका शेतकऱ्याला विविध प्रलोभने दाखवून त्यांच्याकडून मोठ्या प्रमाणावर पैशांची उकळपट्टी केली. 'भोंदूगिरी'च्या माध्यमातून खरात आधी विश्वास संपादन करायचा आणि नंतर आर्थिक गंडा घालायचा, यासोबतच कायद्याचे उल्लंघन करून बेकायदेशीर सावकारीचे जाळेही त्यांनी विणल्याचा संशय पोलिसांनी व्यक्त केला आहे. शिर्डी पोलिसांनी चक्रे वेगाने फिरवत आरोपी खरातला नाशिकमधून अटक केली. अटकेनंतर त्याची राहता ग्रामीण रुग्णालयात वैद्यकीय तपासणी करण्यात आली. यानंतर त्याला राहता न्यायालयात हजर करून पोलिसांनी अधिक चौकशीसाठी कोठडीची मागणी केली. राहता न्यायालयाने अशोक खरातला ९ मे पर्यंत पोलीस कोठडीत ठेवण्याचे आदेश दिले. अशोक खरातची पत्नी कल्पना अद्याप फरार आहे. पोलीस कल्पना खरातला शोधत आहेत.
खरातचा उजवा हात मानला जाणारा अरविंद बावके याला आधीच अटक झाली आहे. अशोक खरात विरोधात शिर्डीतील गुन्ह्यासह एकूण दहा गुन्ह्यांची नोंद झाली आहे.