जयपूर : यंदाच्या आयपीएल मोसमात वादांची मालिका थांबण्याचे नाव घेत नाही. दररोज काही ना काही वाद समोर येत आहेत. नुकतेच युझवेंद्र चहल विमानात ई-सिगारेट वापरताना दिसल्याने क्रिकेटविश्वात मोठी चर्चा रंगली होती. आता National Anti-Doping Agency (नाडा) ने भारतीय क्रिकेटमधील दोन खेळाडूंना नोटीस पाठवली आहे. डोपिंग चाचणीसाठी उपस्थित न राहिल्यामुळे ही नोटीस बजावण्यात आली आहे. हे दोन खेळाडू म्हणजे यशस्वी जयस्वाल आणि शेफाली वर्मा. सध्या यशस्वी जयस्वाल हा राजस्थान रॉयल्स संघाकडून आयपीएलमध्ये खेळत आहे. तर शेफाली वर्मा ही दक्षिण आफ्रिकेविरुद्धच्या टी-२० मालिकेत खेळत आहे. ती सध्या दक्षिण आफ्रिकेत आहे.
नोटीस का पाठवली?
National Anti-Doping Agency (नाडा) ने यशस्वी जयस्वाल आणि शेफाली वर्मा या दोन्ही खेळाडूंना डोपिंग चाचणीसाठी गैरहजर राहिल्याबद्दल नोटीस पाठवली आहे. तसेच त्यांच्या ठिकाणासंबंधी आवश्यक माहिती न दिल्यामुळेही कारवाई करण्यात आली आहे. दोघांनाही स्पष्टीकरण देण्यासाठी अंतिम संधी देण्यात आली आहे. नियमांनुसार, एखादा खेळाडू एका वर्षाच्या कालावधीत तीन वेळा डोपिंग चाचणीसाठी गैरहजर राहिला तर त्या खेळाडूवर दोन वर्षांची बंदी घालण्यात येऊ शकते.
काय आहे संपूर्ण प्रकरण?
National Anti-Doping Agency च्या माहितीनुसार, गेल्या वर्षी १७ डिसेंबर रोजी यशस्वी जयसवाल याची डोपिंग चाचणी करण्यासाठी उत्तेजक नियंत्रण अधिकारी तो ज्या शहारत होता त्याच शहारत गेले होते. पण चाचणीसाठी यशस्वी जयस्वाल गैरहजर होता. त्याचप्रमाणे शेफाली वर्मा हिची चाचणी ७ नोव्हेंबर रोजी होणार होती, पण ती देखील त्या वेळी गैरहजर होती. या प्रकरणात दोघांकडून १८ आणि २० फेब्रुवारी रोजी स्पष्टीकरण मागवण्यात आले होते. मात्र त्यांच्या बाजूने कोणताही प्रतिसाद मिळाला नाही. त्यामुळे नाडाने त्यांना डोपिंग चाचणीसाठी गैरहजर राहिल्याप्रकरणी कारणे दाखवा नोटीस बजावली आहे.