पुणे : पुण्यातून एक अत्यंत चिंताजनक आणि मोठी बातमी समोर येत आहे. काँग्रेसचे प्रदेश सरचिटणीस अभय छाजेड (Abhay Chhajed) यांच्या वाहनाला भीषण अपघात झाला असून यामध्ये ते गंभीर जखमी झाले आहेत. मिळालेल्या माहितीनुसार, मंगळवारी सकाळी ९ वाजेच्या सुमारास पुण्याच्या पिरंगुट परिसरात ही घटना घडली. छाजेड हे आपल्या कामानिमित्त कारने पुण्याच्या दिशेने येत असताना त्यांच्या कारवरचा ताबा सुटला आणि वाहन थेट बाजूला असलेल्या टेकडीवर जाऊन आदळले.
कारवरील नियंत्रण सुटल्याने अनर्थ
हा अपघात इतका भीषण होता की, धडकेनंतर कारचे मोठ्या प्रमाणावर नुकसान झाले आहे. पिरंगुट परिसरातील एका वळणावर चालकाचे गाडीवरील नियंत्रण अचानक सुटले. चालकाने परिस्थिती सावरण्याचा आणि गाडीवर नियंत्रण मिळवण्याचा आटोकाट प्रयत्न केला, मात्र वेग आणि अनियंत्रित झालेली गाडी थेट रस्त्याच्या कडेला असलेल्या टेकडीला जाऊन धडकली. या अपघातात छाजेड आणि त्यांचे चालक दोघेही गंभीररीत्या जखमी झाले आहेत.
स्थानिकांची मदत आणि पोलिसांची धाव
अपघात घडल्यानंतर परिसरातील स्थानिक नागरिकांनी तात्काळ घटनास्थळी धाव घेतली आणि बचावकार्य सुरू केले. घटनेचे गांभीर्य ओळखून पोलिसांनाही याबद्दल माहिती देण्यात आली. जखमी झालेल्या अभय छाजेड आणि त्यांच्या चालकाला तातडीने उपचारांसाठी पुण्यातील 'पुना हॉस्पिटल'मध्ये हलवण्यात आले आहे. सध्या तज्ज्ञ डॉक्टरांच्या देखरेखीखाली त्यांच्यावर उपचार सुरू असून त्यांची प्रकृती चिंताजनक असल्याचे समजते.
हॉस्पिटलमध्ये कार्यकर्त्यांची मोठी गर्दी
अभय छाजेड यांच्या अपघाताची बातमी वाऱ्यासारखी पसरताच पुणे शहरातील काँग्रेस कार्यकर्त्यांनी आणि त्यांच्या समर्थकांनी पुना हॉस्पिटलच्या बाहेर मोठी गर्दी केली आहे. दरम्यान, पोलीस प्रशासन या संपूर्ण प्रकरणाचा सखोल तपास करत आहे. गाडीवरील नियंत्रण नेमके कशामुळे सुटले किंवा काही तांत्रिक बिघाड झाला होता का, या बाबींचा शोध पोलीस सध्या घेत आहेत.