मुंबई : पेट्रोल-डिझेलच्या दरवाढीच्या चर्चांदरम्यान आता सर्वसामान्यांना आणखी एक महागाईचा झटका बसला आहे. मध्यरात्रीपासून सीएनजीच्या दरात अचानक वाढ करण्यात आली असून मुंबई, पुण्यासह राज्यातील अनेक शहरांमध्ये आजपासून नवे दर लागू झाले आहेत. महानगर गॅस लिमिटेडने (MGL) कॉम्प्रेस्ड नॅचरल गॅसच्या (CNG) किरकोळ दरात प्रति किलो २ रुपयांची वाढ जाहीर केली आहे. त्यामुळे ८२ रुपये प्रति किलो दराने मिळणारा सीएनजी आता ८४ रुपये प्रति किलो दराने विकला जाणार आहे.
आखाती देशांमध्ये सुरू असलेल्या संघर्षाचा परिणाम आता जागतिक अर्थव्यवस्थेवर दिसून येत आहे. जगभरात महागाईने उच्चांक गाठला असून इंधनाच्या दरांमध्ये सातत्याने वाढ होत आहे. त्याच पार्श्वभूमीवर भारतातही महागाईचा भडका उडताना दिसत आहे. जागतिक बाजारात रुपयाची घसरण आणि कच्च्या तेलाच्या वाढलेल्या किंमती यामुळे सीएनजीच्या दरात वाढ करण्यात आल्याचे सांगितले जात आहे. केंद्र सरकारकडून परिस्थिती नियंत्रणात ठेवण्यासाठी विविध उपाययोजना केल्या जात असल्या तरी इंधन दरवाढीचा फटका सर्वसामान्यांना बसत आहे.
सीएनजी दरवाढीचा थेट परिणाम मुंबईच्या वाहतूक व्यवस्थेवर होणार असल्याचे मानले जात आहे. रिक्षा आणि टॅक्सी चालकांकडून भाडेवाढीची मागणीही करण्यात येत आहे. मुंबई महानगर प्रदेशात सुमारे १२.८ लाख वाहने सीएनजीवर चालतात. यामध्ये अंदाजे ४ लाख ७० हजार ऑटोरिक्षा, १ लाख ६० हजारांहून अधिक टॅक्सी आणि ५ लाखांपेक्षा जास्त खासगी वाहनांचा समावेश आहे. त्यामुळे या दरवाढीनंतर मुंबईकरांचा दैनंदिन प्रवास खर्च वाढण्याची शक्यता वर्तवली जात आहे.