मुंबई : खार (पश्चिम) येथील लिंकिंग रोडवर राजकुमार ज्वेलर्सजवळ रिक्षावर झाड कोसळल्याने,१४ वर्षीय मुलीचा मृत्यू झाला असून, दुसरी तरुणी अद्यापही गंभीर जखमी आहे.
१० मे रोजी रात्री साडेदहा ३० च्या सुमारास 'ब्लू स्टोन बिल्डर'च्या आवारातील झाड रस्त्यावरून जाणाऱ्या एका रिक्षावर कोसळले, यामुळे रिक्षातील दोन महिला प्रवासी झाडाखाली अडकल्या आणि त्यांना गंभीर दुखापत झाली. या अपघातात एका १४ वर्षीय मुलीला आणि तिच्या २१ वर्षीय मैत्रिणीला गंभीर दुखापत झाली होती. दोन्ही जखमींना तातडीने खार येथील हिंदुजा रुग्णालयात उपचारासाठी दाखल करण्यात आले. हिंदुजा रुग्णालयाच्या वैद्यकीय समन्वयक डॉ. नुपूर त्रिवेदी यांनी रविवारी सकाळी १० वाजता दिलेल्या वैद्यकीय माहितीनुसार, गंभीर दुखापतींशी जवळपास एक आठवडा लढा दिल्यानंतर एरिका श्रीवास्तव (१४) हिला मृत घोषित करण्यात आले.
दुसरीकडे, या घटनेतील दुसरी जखमी तरुणी, हर्षिता कुमार (२१), ही अद्यापही अतिदक्षता विभागात दाखल असून, तिची प्रकृती चिंताजनक असल्याचे सांगण्यात आले आहे. या दुर्दैवी घटनेमुळे झाडांची निगा राखणे आणि सार्वजनिक सुरक्षा यांबाबत, विशेषतः सार्वजनिक रस्त्यांना लागून असलेल्या खाजगी आवारांमधील झाडांच्या संरचनात्मक स्थिरतेबाबत, पुन्हा एकदा चिंता व्यक्त केली जात आहे.
दादरमध्ये पेट्रोल पंपावर मोठे झाड कोसळले
एका अन्य घटनेत, मुंबईतील दादर भागात गोखले रोडवरील एका सीएनजी पेट्रोल पंपावर रविवारी संध्याकाळी एक भलेमोठे झाड कोसळले. या घटनेमुळे परिसरात एकच घबराट उडाली झाड कोसळून इंधन केंद्राच्या (पेट्रोल पंपाच्या) एका भागावर पडताच, स्थानिक रहिवासी आणि वाहनचालकांनी सुरक्षित ठिकाणी धाव घेतली. अधिकाऱ्यांनी सांगितले की, झाड हटवण्यासाठी आणि झालेल्या नुकसानीचा आढावा घेण्यासाठी अग्निशमन दल व महापालिका कर्मचाऱ्यांसह आपत्कालीन पथके घटनेनंतर त्वरित घटनास्थळी दाखल झाली. या घटनेत अद्याप कोणालाही दुखापत झाल्याचे वृत्त नाही. मात्र, दादरसारख्या गजबजलेल्या भागात झाड हटवण्याचे काम सुरू असताना, वाहतुकीत काही प्रमाणात व्यत्यय आल्याचे दिसून आले.