लखनौ : येथील लखीमपूर खेरी येथे सोमवारी सकाळी साडेसात वाजण्याच्या सुमारास झालेल्या भीषण रस्ते अपघातात १० जणांचा दुर्दैवी मृत्यू झाला. पीलीभीत-बस्ती महामार्गावर अदलीसपूर गावाजवळ भरधाव ट्रकने समोरून येणाऱ्या मॅजिक वाहनाला जोरदार धडक (Uttar Pradesh Road Accident) दिली. या भीषण धडकेत मॅजिक वाहनाचा पूर्ण चक्काचूर झाला. वाहनात दोन महिलांसह अंदाजे एकूण १२ जण प्रवास करत होते. अपघात इतका भयंकर होता की सर्वांचा जागीच मृत्यू झाला, तर एका गंभीर जखमीचा उपचारासाठी नेत असताना मृत्यू झाला.
अपघातानंतरचे दृश्य अत्यंत हृदयद्रावक होते. मॅजिक वाहनात बसलेले अनेक प्रवासी सीटच्या मध्येच अडकून पडले होते. काहींची डोकी फुटली होती, तर एका व्यक्तीचा संपूर्ण चेहरा फाटल्याची माहिती समोर आली आहे. धडकेच्या तीव्रतेमुळे दोन प्रवासी वाहनाबाहेर फेकले गेले आणि रस्त्यावर पडले. त्यांच्या डोक्याला गंभीर दुखापत झाली होती. घटनास्थळी सर्वत्र रक्ताचे डाग पसरले होते. आसपासच्या नागरिकांनी तातडीने घटनास्थळी धाव घेत मदतकार्य सुरू केले आणि पोलिसांना माहिती दिली. (Uttar Pradesh Road Accident)
खमरिया विभागाचे क्षेत्राधिकारी शमशेर बहादूर सिंह यांनी सांगितले की, अपघातानंतर ट्रक चालक घटनास्थळावरून फरार झाला असून पोलिसांनी ट्रक ताब्यात घेतला आहे. चालकाचा शोध सुरू आहे. दरम्यान, सामुदायिक आरोग्य केंद्र खमरियाचे अधीक्षक डॉ. अमित कुमार सिंह यांनी सांगितले की, अपघातानंतर दोन महिला आणि सात पुरुषांचे मृतदेह रुग्णालयात आणण्यात आले होते. अनेक मृतदेह गंभीररीत्या चिरडले गेले होते. एका गंभीर जखमी पुरुषाला जिल्हा रुग्णालयात हलवण्यात आले होते, मात्र वाटेतच त्याचा मृत्यू झाला. (Uttar Pradesh Road Accident)
या भीषण अपघातामुळे परिसरात शोककळा पसरली असून महामार्गावरील सुरक्षेचा प्रश्न पुन्हा ऐरणीवर आला आहे. (Uttar Pradesh Road Accident)