पाकिस्तान : पाकिस्तानच्या वायव्य भागातील खैबर पख्तुनख्वा प्रांतात बुधवारी दोन सशस्त्र गटांमध्ये भीषण चकमक झाली. या संघर्षात किमान १४ दहशतवादी ठार झाले असून अनेक जण गंभीर जखमी झाल्याची माहिती पोलिसांनी दिली आहे. अफगाणिस्तान सीमेलगत असलेल्या मध्यवर्ती कुर्रम जिल्ह्यातील मनाटो कामरान परिसरात ही रक्तरंजित चकमक घडली. घटनेनंतर संपूर्ण परिसरात तणावपूर्ण शांतता पसरली असून सुरक्षा दलांनी मोठी शोधमोहीम सुरू केली आहे.
पोलिस अधिकाऱ्यांनी दिलेल्या माहितीनुसार, या चकमकीत दहशतवादी कमांडर काझिम आणि मुमताज इम्ती यांच्या गटांतील सदस्य सहभागी होते. दोन्ही गटांमध्ये दीर्घकाळापासून वर्चस्व आणि खंडणीच्या पैशांवरून वाद सुरू होता. हा वाद बुधवारी हिंसक स्वरूपात समोर आला आणि दोन्ही बाजूंनी तुफान गोळीबार करण्यात आला. या चकमकीदरम्यान मुमताज इम्ती देखील मारला गेल्याची पुष्टी अधिकाऱ्यांनी केली आहे.
मनाटो कामरान किल्ला परिसरात अनेक सशस्त्र गट सक्रिय असल्याचा संशय व्यक्त करण्यात आला असून, या भागात सुरक्षा दलांची उपस्थिती मोठ्या प्रमाणात वाढवण्यात आली आहे. पोलीस आणि लष्कर संयुक्तपणे परिसराची तपासणी करत असून संशयित दहशतवाद्यांचा शोध घेतला जात आहे.
दरम्यान, ठार झालेला कमांडर काझिम हा तहरीक-ए-तालिबान पाकिस्तान (TTP) या दहशतवादी संघटनेशी संबंधित असल्याचे सांगितले जात आहे. तो खैबर पख्तुनख्वा प्रांतातील कुर्रम जिल्ह्याचा रहिवासी होता. पाकिस्तानी सुरक्षा दलांवर तसेच नागरिकांवर झालेल्या अनेक हल्ल्यांमध्ये त्याचा सहभाग असल्याचा आरोप आहे. ऑक्टोबर २०२५ मध्ये प्रांतीय सरकारने त्याच्यावर १०० दशलक्ष पाकिस्तानी रुपयांचे बक्षीस जाहीर केले होते. स्थानिक भागात वर्चस्व प्रस्थापित करणे आणि खंडणीच्या पैशांवर नियंत्रण मिळवणे, हा दोन्ही गटांमधील संघर्षाचा मुख्य मुद्दा असल्याचे अधिकाऱ्यांनी सांगितले.