गडचिरोली : गडचिरोली जिल्हा माओवादमुक्त करण्याच्या दिशेने पोलिसांनी आणखी एक मोठे यश संपादन केले आहे. ‘ऑपरेशन अंतिम प्रहार’ अंतर्गत आत्मसमर्पण केलेल्या माओवाद्यांनी दिलेल्या गोपनीय माहितीच्या आधारे गडचिरोली पोलिसांनी बिनागुंडा जंगल परिसरात धडक कारवाई करत माओवाद्यांचा शस्त्रनिर्मिती कारखाना उद्ध्वस्त केला आहे. तसेच घातपाती कारवायांसाठी जमिनीखाली लपवून ठेवलेले मोठ्या प्रमाणावरील शस्त्र आणि स्फोटक साहित्य घटनास्थळीच नष्ट करण्यात आले.
गेल्या १६ मे रोजी ‘ऑपरेशन अंतिम प्रहार’ अंतर्गत काही माओवाद्यांनी गडचिरोली पोलिसांसमोर आत्मसमर्पण केले होते. चौकशीदरम्यान त्यांनी बिनागुंडा पोलीस मदत केंद्राच्या हद्दीतील जंगल परिसरात शस्त्रनिर्मितीचे कारखाने आणि घातक साहित्य लपवून ठेवल्याची माहिती दिली होती.या माहितीच्या आधारे एम. रमेश यांच्या मार्गदर्शनाखाली २१ मे रोजी विशेष अभियान पथक (सी-60), प्राणहिता दल तसेच बीडीडीएसच्या (बॉम्ब शोधक व नाशक पथक) संयुक्त तुकड्यांना शोध मोहिमेसाठी रवाना करण्यात आले.बिनागुंडाच्या उत्तरेकडील जंगल परिसरात २२ मे रोजी सुरक्षा दलांनी वेढा घालून शोधमोहीम राबवली. तपासणीदरम्यान जमिनीखाली लपवून ठेवलेले विविध प्रकारचे साहित्य हस्तगत करण्यात आले. यामध्ये लेथ मशीन, ग्राइंडिंग आणि ड्रिलिंग मशीन, जीग सॉ मशीन, प्रेशर पंप यांसारखी शस्त्रनिर्मिती यंत्रे आढळून आली. तसेच बीजीएल पाईप्स, १२ बोअर पाईप्स, इन्व्हर्टर, जनरेटर, बॅटरी, सोलर पॅनल आणि इतर साहित्यही जप्त करण्यात आले.
पोलिसांच्या माहितीनुसार, आगामी निवडणुका किंवा नक्षल सप्ताहादरम्यान सुरक्षा दलांवर घातपाती कारवाया करण्यासाठी हे साहित्य लपवून ठेवण्यात आले होते. वरिष्ठ अधिकाऱ्यांच्या आदेशानुसार सर्व साहित्य घटनास्थळीच नष्ट करण्यात आले.ही कारवाई पोलीस अधीक्षक एम. रमेश, अपर पोलीस अधीक्षक (अभियान) कार्तिक मधीरा, अपर पोलीस अधीक्षक (प्रशासन) गोकूल राज जी आणि पोलीस उपअधीक्षक (अभियान) विशाल नागरगोजे यांच्या मार्गदर्शनाखाली पार पडली.या धाडसी मोहिमेत सहभागी सर्व जवानांचे पोलीस अधीक्षक एम. रमेश यांनी जाहीर कौतुक केले आहे.