Crime News : दक्षिण मुंबईतील आग्रीपाडा परिसरातील हायप्रोफाइल यास्मीन टॉवरमध्ये सुरू असलेला ड्रग्जचा मोठा रॅकेट मुंबई पोलिसांनी उद्ध्वस्त केला आहे. २३ मजली इमारतीच्या १०व्या मजल्यावरील फ्लॅटमध्ये एमडी ड्रग्ज तयार करण्यासाठी प्रयोग शाळा उभारण्यात आली होती. या प्रकरणी पोलिसांनी एका बांगलादेशी महिलेसह तिघांना अटक केली आहे. तब्बल ५१ कोटी रुपयांचा मुद्देमाल जप्त करण्यात आले आहे.
अटक करण्यात आलेल्यांमध्ये शोएब मन्सुरी (३१), सुफियान मन्सुरी (२८) आणि मामुनी सरकार (२७) यांचा समावेश आहे. आरोपी फ्लॅटच्या स्वयंपाकघरात रासायनिक प्रक्रिया करून एमडी ड्रग्ज तयार करत होते. पोलिसांनी छाप्यात मोठ्या प्रमाणात कच्चा माल, तयार ड्रग्ज, पिस्तूल आणि १९ जिवंत काडतुसे जप्त केली आहेत.
मुंबई पोलिसांच्या अमली पदार्थविरोधी पथकाला (Mumbai Police anti-narcotics squad) आग्रीपाडा भागात शंकास्पद हालचालींबाबत माहिती मिळाली होती. त्यानंतर कांदिवली युनिटच्या पथकाने यास्मीन टॉवरवर छापा मारला. फ्लॅटमध्ये प्रवेश करताच उग्र रासायनिक वास आणि प्रयोगशाळेसारखी उपकरणे पाहून पोलिसांनाही धक्का बसला.तपासात उघड झाले की, ड्रग्ज तयार करण्यासाठी आरोपींनी हा फ्लॅट खास घेतला होता. दरमहिने ४५ हजार रुपयांनी घेतलेल्या या फ्लॅटमध्ये ड्रग्ज बनवण्याचा उपक्रम केला जात होता . बाहेर वास जाऊ नये म्हणून ते सतत एसी सुरू ठेवत आणि धूप-कापराचा वापर करत होते.मुख्य आरोपी शोएब मन्सुरी विरोधात यापूर्वीच २१ गंभीर गुन्हे दाखल आहेत. ड्रग्ज व्यवसायात दबदबा निर्माण करण्यासाठी त्याने शस्त्रसाठाही ठेवला होता. ही शस्त्रे कुठून आणली आणि या रॅकेटमागे आणखी कुणाचा-कुणाचा हात आहे, याची सखोल तपासणी पोलीस करत आहेत