मुलुंड : मुंबईच्या मुलुंड (Mulund) परिसरातून एक धक्कादायक अपघाताची घटना समोर आली आहे. मुलुंडमधील सिटी ऑफ जॉय निर्मला सोसायटीजवळ भरधाव वेगाने आलेल्या किया कारने (Kia Car) भाजी विक्रेत्यांच्या गाडीला जोरदार धडक दिली. या भीषण अपघातात एका महिलेचा जागीच मृत्यू झाला असून आणखी दोघेजण गंभीर जखमी झाले आहेत. या घटनेमुळे परिसरात मोठी खळबळ उडाली आहे.
मिळालेल्या माहितीनुसार, मुलुंडच्या सिटी ऑफ जॉय निर्मला सोसायटी परिसरात रस्त्याच्या कडेला भाजी विक्रेते आपला व्यवसाय करत होते. त्याचवेळी भरधाव वेगात आलेल्या किया कारने नियंत्रण गमावत थेट भाजीच्या गाडीला धडक दिली. धडक इतकी भीषण होती की, एका महिलेचा जागीच मृत्यू झाला. मृत महिलेची अद्याप ओळख पटलेली नाही.
या अपघातात आणखी दोघेजण गंभीर जखमी झाले असून त्यांनाही कारने (Car) जोरदार धडक दिल्याची माहिती समोर आली आहे. जखमी व्यक्तींचीही अद्याप ओळख पटलेली नाही. अपघातानंतर परिसरात नागरिकांची मोठी गर्दी जमली होती.
घटनेची माहिती मिळताच पोलिसांनी तातडीने घटनास्थळी धाव घेतली. पोलिसांनी मृत महिलेचा मृतदेह ताब्यात घेतला असून जखमींना जवळच्या रुग्णालयात उपचारासाठी दाखल करण्यात आले आहे. दरम्यान, अपघातानंतर किया कारचा चालक (Driver) घटनास्थळावरून फरार झाल्याची माहिती समोर येत आहे. या प्रकरणी पोलिसांकडून पुढील तपास सुरू असून अद्याप कोणताही गुन्हा दाखल करण्यात आलेला नाही.