Crime News : मुंबईतील चेंबूर परिसरातून घरगुती हिंसाचाराची संतापजनक घटना समोर आली आहे. एका सराईत गुन्हेगाराने आपल्या पत्नीचा तब्बल चार तास अमानुष छळ करत तिला मुर्गा करून ठेवले होते. पट्ट्याने मारहाण केली आणि तलवारीने ठार मारण्याच्या धमक्या दिल्या. एवढ्यावरच न थांबता पत्नी माहेरी गेल्यानंतर आरोपीने तेथेही धडक देत पत्नी, सासरे आणि मेव्हण्यावर चाकूने हल्ला केला. या घटनेमुळे परिसरात मोठी खळबळ उडाली आहे.
नेमकं घडलं काय ?
पोलिसांनी दिलेल्या माहितीनुसार, पीडित महिला वाशीनाका परिसरातील रहिवासी आहे. तिचा पती अरबाज अन्वर अली सय्यद हा सराईत गुन्हेगार आहे. त्याच्याविरोधात यापूर्वी 18 गुन्ह्यांची नोंद आहे. डिसेंबर 2025 मध्ये त्याला तडीपारही करण्यात आले होते. बकरी ईदच्या दिवशी आरोपीने पत्नीला कपडे आणि अत्तर खरेदी करण्याच्या बहाण्याने विजय नगर परिसरात आणले. मात्र तेथे पोहोचल्यानंतर त्याने पत्नीशी वाद घालत शिवीगाळ आणि मारहाण सुरू केली. आरोपीने पत्नीला पट्ट्याने बेदम मारहाण करत तिला सुमारे चार तास मुर्गा बनवून छळ केला. तसेच तलवारीने कापून टाकण्याची आणि ॲसिड हल्ला करण्याची धमकी दिल्याचा आरोप पत्नीने केला आहे.
माहेरी जाऊन पत्नीला संपवलं....
रात्री सुमारे 9 वाजण्याच्या सुमारास महिला आरोपीच्या तावडीतून सुटका करून घेऊन माहेरी पोहोचली. मात्र पत्नी माहेरी गेल्याच्या रागाच्या भरात तो पण तिथे आला आणि त्याने पीडितेचे वडील आणि भाऊ यांच्याशी वाद घालत मारहाण सुरू केली. गोंधळ ऐकून बाहेर आलेल्या महिलेच्या बहिणीलाही आरोपीने लाथाबुक्क्यांनी मारहाण केल्याचे सांगितले जात आहे. वाद वाढल्यानंतर आरोपीने चाकू काढून पत्नीवर जीवघेणा हल्ला केला. स्वतःचा बचाव करताना महिलेच्या हाताला गंभीर दुखापत झाली आहे. आरोपीने हवेत चाकू फिरवत परिसरातील नागरिकांनाही धमकावले. मध्ये पडलात तर ठार मारेन, अशी धमकी देत त्याने घाबरवले.जखमी महिलेला तिच्या भावाने तातडीने शताब्दी रुग्णालयात दाखल केले. या प्रकरणी आरसीएफ पोलिसांनी हत्या करण्याचा प्रयत्न, मारहाण, धमकी आणि इतर गंभीर कलमांखाली गुन्हा दाखल करत आरोपी अरबाज सय्यद याला अटक केली आहे. पोलिसांकडून पुढील तपास सुरू असून या घटनेमुळे मुंबईतील महिला सुरक्षेचा प्रश्न पुन्हा एकदा चर्चेत आला आहे.