भुसावळ : मानवी संवेदनशीलता, तत्परता आणि सेवेची भावना जपत मध्य रेल्वेच्या रनिंग स्टाफने धावत्या रेल्वेत एका महिलेची सुरक्षित प्रसूती घडवून आणत आई आणि बाळाचे प्राण वाचवले. गाडी क्रमांक १५९४५ लोकमान्य टिळक टर्मिनस-दिब्रुगड एक्स्प्रेसमध्ये भुसावळ आणि इटारसी दरम्यान हा प्रसंग घडला.
रेल्वेत प्रवास करणारे रवी चौधरी यांनी पत्नी ज्योती चौधरी यांना अचानक प्रसूती वेदना सुरू झाल्याची माहिती कंडक्टर एस. पी. फिरके आणि तिकीट तपासनीस अंबरीश कुमार तिवारी यांना दिली. परिस्थितीचे गांभीर्य ओळखून रेल्वे कर्मचाऱ्यांनी तत्काळ मदतकार्य सुरू केले. बी-६ डब्याच्या गॅलरीत ब्लँकेट व चादरींच्या साहाय्याने स्वच्छ आणि सुरक्षित जागा तयार करण्यात आली. तसेच महिलेला आवश्यक ती मदत व काळजी देण्यात आली. दरम्यान, भोपाळ नियंत्रण कक्षाशी संपर्क साधून हरदा स्थानकावर डॉक्टर व रुग्णवाहिका सज्ज ठेवण्याच्या सूचना देण्यात आल्या.
रेल्वेतील महिला प्रवासी आणि कर्मचाऱ्यांच्या सहकार्याने ज्योती चौधरी यांनी धावत्या रेल्वेतच एका निरोगी मुलाला जन्म दिला. नवजात बाळाच्या रडण्याचा आवाज ऐकताच डब्यातील प्रवाशांनी सुटकेचा निश्वास सोडला. रेल्वे हरदा स्थानकावर पोहोचताच रेल्वे सुरक्षा दल, महिला कॉन्स्टेबल आणि पॅरामेडिक्सची टीम मदतीसाठी सज्ज होती. आई आणि बाळाला पुढील उपचारांसाठी रुग्णालयात दाखल करण्यात आले असून दोघांचीही प्रकृती स्थिर आहे. या घटनेमुळे भारतीय रेल्वे ही संकटावेळी मदतीला धावून येणारी जीवनवाहिनी असल्याचे पुन्हा अधोरेखित झाले.