मिळालेल्या माहितीनुसार, चोरीची घटना अभिनेत्रीच्या आईच्या घरात घडली. घरातील दागिने आणि काही मौल्यवान वस्तू अचानक गायब झाल्याचे कुटुंबीयांच्या लक्षात आले. त्यानंतर त्यांनी घरात शोधाशोध सुरू केली. सुरुवातीला वस्तू नेमक्या कुठे गेल्या याबाबत संभ्रम होता. मात्र, संशय वाढल्यानंतर एका महिलेची चौकशी करण्यात आली.
राशी छाबडिया असे अटक करण्यात आलेल्या ४७ वर्षीय महिलेचे नाव आहे. ती गेल्या काही वर्षांपासून टंडन कुटुंबाच्या संपर्कात होती. विशेषतः अभिनेत्रीच्या आईची देखभाल करण्यासाठी ती नियमितपणे घरात येत होती. त्यामुळे कुटुंबीयांचा तिच्यावर पूर्ण विश्वास होता. याच विश्वासाचा गैरफायदा घेतल्याचा आरोप तिच्यावर करण्यात आला आहे.
पोलिसांच्या प्राथमिक तपासानुसार, घरातील तिजोरीत ठेवलेले सोने, हिऱ्यांचे दागिने तसेच दोन महागडी घड्याळे चोरीला गेली आहेत. चोरी झालेल्या वस्तूंची किंमत सुमारे २५ लाख रुपये असल्याचे सांगितले जात आहे.
कुटुंबीयांनी पोलिसांकडे तक्रार दाखल केल्यानंतर तपासाला वेग देण्यात आला. मिळालेल्या पुराव्यांच्या आधारे पोलिसांनी आरोपी महिलेला ताब्यात घेतले. चौकशीनंतर तिला अटक करण्यात आली आहे.
दरम्यान, पोलिसांनी काही चोरीची घड्याळे जप्त करण्यात यश मिळवले आहे. मात्र, दागिन्यांचा मोठा भाग अद्याप सापडलेला नाही. चोरीतील इतर कोणाचा सहभाग आहे का, तसेच उर्वरित दागिने कुठे आहेत, याचा तपास सध्या सुरू आहे. या घटनेमुळे सेलिब्रिटींसह सर्वसामान्य नागरिकांमध्येही घरातील विश्वासू व्यक्तींविषयी सावध राहण्याची चर्चा सुरू झाली आहे.