Nashik : नाशिक जिल्ह्यातील सर्व पेट्रोल पंप चालक, डीलर्स तसेच व्यावसायिक आणि औद्योगिक संस्थांनी इंधन खरेदी-विक्री संदर्भातील नियमांचे काटेकोर पालन करावे. किरकोळ विक्री केंद्रांमधून व्यावसायिक, औद्योगिक अथवा संस्थात्मक ग्राहकांना अनधिकृतपणे इंधन पुरवठा करणे किंवा इंधन वळविणे सक्त मनाई आहे. असे प्रकार आढळल्यास संबंधित पेट्रोल पंपाचा परवाना रद्द करण्यासह फौजदारी कारवाई करण्यात येईल, असा इशारा जिल्हाधिकारी आयुष प्रसाद (Ayush Prasad) यांनी दिला आहे.
मोठ्या व्यावसायिक, संस्थात्मक ग्राहकांना इंधन पुरवठा करणे नियमबाह्य
जिल्हाधिकारी प्रसाद (Ayush Prasad) म्हणाले की, किरकोळ ग्राहक आणि संस्थात्मक ग्राहक या दोन स्वतंत्र श्रेणी असून त्यांच्या इंधन खरेदीसाठी वेगवेगळ्या तरतुदी लागू आहेत. सर्वोच्च न्यायालयाने (Supreme Court) इंडियन ऑईल कॉर्पोरेशन विरुद्ध केरळ स्टेट रोड ट्रान्सपोर्ट कॉर्पोरेशन (2018) 12 SCC 518 या प्रकरणातील निकालातही या दोन्ही ग्राहक वर्गांमधील भेद स्पष्ट केला आहे. त्यामुळे किरकोळ पेट्रोल पंपांद्वारे मोठ्या व्यावसायिक किंवा संस्थात्मक ग्राहकांना इंधन पुरवठा करणे नियमबाह्य ठरते.( Nashik News )
अनधिकृत व्यवहार, साठवणूकीवर लक्ष
केंद्र शासनाच्या द मोटार स्पिरिट अँड हाय स्पीड डिझेल (रेग्युलेशन ऑफ सप्लाय, डिस्ट्रिब्युशन अँड प्रिव्हेन्शन ऑफ मॅल्प्रॅक्टिसेस) ऑर्डर, 2005 तसेच राज्य शासनाच्या संबंधित आदेशांनुसार इंधन पुरवठा व वितरणातील गैरप्रकारांना प्रतिबंध करण्यासाठी कठोर तरतुदी करण्यात आल्या आहेत. पेट्रोलियम पदार्थांच्या (Petroleum products) पुरवठा साखळीत कोणत्याही प्रकारचा अनधिकृत व्यवहार, साठवणूक अथवा वळवण रोखण्यासाठी प्रशासनाकडून विशेष दक्षता घेतली जात आहे.
अनधिकृत इंधन पुरवठा केल्यास परवाना रद्द होणार
जिल्ह्यात विशेष तपासणी मोहीम राबविण्यात येणार असून जिल्हा पुरवठा अधिकारी, उपविभागीय अधिकारी, तहसीलदार आणि इतर संबंधित यंत्रणांमार्फत पेट्रोल पंप तसेच इंधन वाहतूक करणाऱ्या वाहनांची आकस्मिक तपासणी करण्यात येणार आहे. अनधिकृत इंधन वळवण अथवा पुरवठा केल्याचे निदर्शनास आल्यास संबंधित डीलरचा परवाना तत्काळ निलंबित अथवा रद्द करण्यात येईल. तसेच अत्यावश्यक वस्तू अधिनियम, 1955 आणि इतर लागू कायद्यांनुसार संबंधितांविरुद्ध फौजदारी गुन्हे दाखल करण्यात येतील, असेही जिल्हाधिकारी श्री. प्रसाद यांनी सांगितले.
जिल्ह्यातील सर्व पेट्रोल पंप चालकांनी नियमांचे पालन करून कोणत्याही प्रकारच्या अनधिकृत व्यावसायिक इंधन पुरवठ्यापासून दूर राहावे आणि इंधन वितरण व्यवस्थेची पारदर्शकता व शिस्त कायम राखण्यासाठी प्रशासनाला सहकार्य करावे, असे आवाहन जिल्हाधिकारी श्री. प्रसाद यांनी केले.