जेजुरीच्या खंडोबा (Khandoba) मंदिरात दर्शनासाठी येणाऱ्या लाखो भाविकांसाठी महत्त्वाची बातमी समोर आली आहे. जेजुरी (Jejuri) गडावर भंडारा खरेदी करण्यासाठी भाविकांवर दबाव टाकणाऱ्यांविरोधात आता कडक कारवाई करण्यात येणार आहे. अशा प्रकारची सक्ती केल्यास तो खंडणीसारखा गंभीर गुन्हा मानला जाऊ शकतो, असा इशारा जेजुरी पोलिसांनी दिला आहे. (Pune News)
सोन्याची जेजुरी हे महाराष्ट्रातील प्रसिद्ध धार्मिक स्थळ असून दरवर्षी मोठ्या संख्येने भाविक येथे दर्शनासाठी येतात. खंडोबा मंदिर परिसरात भंडाऱ्याची उधळण ही येथील प्रमुख परंपरा मानली जाते. त्यामुळे मंदिर परिसरात भंडारा आणि पूजेचे साहित्य विक्री करणाऱ्या अनेक दुकानांची गर्दी असते.
मात्र, काही व्यापारी भाविकांना विशिष्ट दुकानातूनच भंडारा खरेदी करण्यासाठी आग्रह किंवा दबाव टाकत असल्याच्या तक्रारी प्रशासनाकडे येत होत्या. यामुळे अनेक भाविकांना याचा मनस्ताप सहन करावा लागत होता. या पार्श्वभूमीवर पोलिसांनी स्पष्ट भूमिका घेतली आहे.
जेजुरीचे सहायक पोलीस निरीक्षक दीपक वाकचौरे यांनी याबाबत सूचना देताना सांगितले की, कोणत्याही भाविकाला विशिष्ट दुकानातून खरेदी करण्यास भाग पाडणे किंवा दबाव टाकणे सहन केले जाणार नाही. अशा प्रकारच्या तक्रारी आढळल्यास संबंधितांविरोधात कायदेशीर कारवाई केली जाईल.
तसेच, भाविकांना त्यांच्या पसंतीनुसार कोणत्याही दुकानातून भंडारा किंवा पूजेचे साहित्य खरेदी करण्याचा पूर्ण अधिकार आहे. मंदिर परिसरात येणाऱ्या प्रत्येक भाविकाला मुक्तपणे खरेदी करता यावी आणि त्यांना कोणत्याही प्रकारचा त्रास होऊ नये, यासाठी हा निर्णय घेण्यात आल्याचे प्रशासनाने स्पष्ट केले आहे.
पोलिसांच्या या निर्णयामुळे भाविकांमध्ये समाधानाचे वातावरण असून मंदिर परिसरातील अनावश्यक वाद कमी होण्यास मदत होईल, अशी अपेक्षा व्यक्त केली जात आहे.