कोल्हापूर (Kolhapur Crime) जिल्ह्यात एका १९ वर्षीय महाविद्यालयीन तरुणीवर झालेल्या कथित लैंगिक (Molest) अत्याचाराच्या प्रकरणाने खळबळ उडाली आहे. पीडित मुलीचे अश्लिल फोटो आणि व्हिडिओ सोशल मीडियावर व्हायरल करण्याची धमकी देत चार मित्रांनी १० महिन्यांपर्यंत तिचा छळ केल्याचा आरोप आहे. या प्रकरणी मुरगुड पोलीस ठाण्यात गुन्हा दाखल करण्यात आला असून पोलिसांनी चारही आरोपींना अटक केली आहे.
पोलिसांनी दिलेल्या माहितीनुसार, पीडित तरुणीची ओळख मुख्य आरोपीशी एका कामाच्या निमित्ताने झाली होती. ओळख वाढल्यानंतर आरोपीने तिला ओळखपत्र तयार करून देण्याचे कारण सांगत भेटीस बोलावले. त्यानंतर तिचे काही फोटो काढून ते सोशल मीडियावर टाकण्याची धमकी देत तिच्यावर अत्याचार केल्याचा आरोप आहे.
या प्रकरणानंतर मुख्य आरोपीने आपल्या इतर तीन मित्रांची ओळख करून दिली. त्यानंतर पीडित मुलीला धमकावून विविध ठिकाणी नेण्यात आले. फोटो आणि व्हिडिओ सार्वजनिक करण्याची भीती दाखवत तिच्यावर वारंवार अत्याचार करण्यात आल्याचा आरोप तक्रारीत करण्यात आला आहे.
पीडितेच्या म्हणण्यानुसार, आरोपींनी वेगवेगळ्या ठिकाणी तिला बोलावून मानसिक दबाव टाकला. तसेच तिच्याविरोधात आक्षेपार्ह माहिती पसरवण्याची धमकी देत तिचे शोषण सुरू ठेवले. अनेक महिन्यांपासून सुरू असलेल्या या प्रकारामुळे ती मानसिक तणावाखाली होती.
अखेर आरोपींच्या सततच्या त्रासाला कंटाळून तरुणीने पोलिसांकडे धाव घेतली. आदित्य बाजीराव शेटके (वय २४, रा. खिंडी व्हरवडे, ता. राधानगरी), रणजित संभाजी मुधोळकर (वय २१, रा. सोळांकुर, ता. राधानगरी) प्रणवगिरी चंद्रशेखर पालकर (वय २४, रा. राधानगरी) आणि विक्रम रामचंद्र पाटील (वय २२, रा. बुजवाडे, ता. राधानगरी) अशी आरोपींची ओळख समोर आली आहे. तक्रार मिळताच पोलिसांनी तातडीने तपास सुरू केला आणि चारही संशयितांना ताब्यात घेतले. न्यायालयाने आरोपींना पोलीस कोठडी सुनावली असून या प्रकरणाचा पुढील तपास सुरू आहे.
या घटनेमुळे परिसरात संताप व्यक्त केला जात असून महिलांच्या सुरक्षिततेचा मुद्दा पुन्हा एकदा चर्चेत आला आहे. पोलिसांनी नागरिकांना अशा प्रकारच्या धमक्या किंवा छळ झाल्यास त्वरित तक्रार करण्याचे आवाहन केले आहे.