पुणे : पुणे जिल्ह्यातील नसरापूर येथील चिमुकलीवर झालेल्या अत्याचार आणि खून प्रकरणाच्या खटल्यात एक मोठी घडामोडी समोर आली आहे. घटनेच्या वेळी घटनास्थळी उपस्थित असलेल्या तीन लहान मुलांनी अत्यंत निर्भीडपणे न्यायालयासमोर आपली साक्ष नोंदवली. आरोपी भीमराव कांबळे यानेच पीडित मुलीला पत्र्याच्या शेडमध्ये नेल्याचे आणि त्यांना पाहून दगड मारल्याचा संपूर्ण घटनाक्रम या प्रत्यक्षदर्शी मुलांनी न्यायालयाला सांगितला.
पुण्याच्या विशेष न्यायालयाचे न्यायाधीश एस. आर. साळुंखे यांच्यासमोर या खटल्याची सुनावणी सुरू आहे. मंगळवारी (२ जून) या तीनही प्रत्यक्षदर्शी मुलांची साक्ष न्यायालयात नोंदविण्यात आली. या खटल्यातील आरोपी भीमराव प्रभाकर कांबळे (वय ६५ वर्ष, रा. भोर) याच्याविरुद्ध राजगड पोलीस ठाण्यात गुन्हा दाखल आहे. घटनेच्या दिवशी आरोपी पीडित मुलीला गोठ्याशेजारच्या पत्र्याच्या शेडमध्ये घेऊन जात असताना तेथे खेळत असलेल्या तीन मुलांनी त्याला पाहिले होते. मुलांनी शेडच्या फटीतून पाहिले असता आरोपी मुलीसोबत दिसून आला होता. मुलांनी न्यायालयात सांगितले की, त्यांना पाहिल्यानंतर आरोपीने त्यांच्या दिशेने दगडही फेकून मारले होते. या मुलांनी यापूर्वीच येरवडा कारागृहात झालेल्या ओळख परेडमध्ये आरोपीला ओळखले होते. आता सुनावणीदरम्यान येरवडा जेलमधून 'व्हिडीओ कॉन्फरन्सिंग 'द्वारे हजर करण्यात आलेल्या आरोपीला मुलांनी न्यायालयातही अचूक ओळखले.
८२ साक्षीदारांची यादी
या अत्यंत संवेदनशील खटल्यात सरकार पक्षातर्फे एकूण ८२ साक्षीदारांची यादी न्यायालयासमोर सादर करण्यात आली आहे. यापैकी पहिल्या १६ महत्त्वाच्या साक्षीदारांची साक्ष विशेष सरकारी वकील अॅड. अजय मिसर यांनी न्यायालयासमोर नोंदवून घेतली आहे. दरम्यान, बचाव पक्षातर्फे अॅड. हिंमतराव सूर्यवंशी यांनी या साक्षीदारांची उलटतपासणी घेतली. प्रत्यक्षदर्शी मुलांच्या या खंबीर साक्षीमुळे सरकारी पक्षाची बाजू कोर्टात अधिक मजबूत झाल्याचे बोलले जात आहे.