मुंबई: मुंबईजवळ समुद्रात कार्यरत असलेल्या एका तेलवाहू जहाजावर दुर्दैवी घटना घडली असून जहाजावरील ४३ वर्षीय मुख्य अधिकाऱ्याचा मृत्यू झाला आहे. साफसफाईच्या कामादरम्यान तेलाच्या टाकीत कोसळल्याने हा प्रकार घडल्याची माहिती पोलिसांनी दिली आहे. मृत व्यक्तीचे नाव हर्षा गोपालन राजन असून ते मूळचे चेन्नई येथील रहिवासी होते. ते 'जग आबा' या तेलवाहू जहाजावर मुख्य अधिकारी म्हणून कार्यरत होते. ही घटना १ जून रोजी सकाळी सुमारे ९.३० वाजण्याच्या सुमारास घडली.
मिळालेल्या माहितीनुसार, जहाजावरील स्लोप पोर्ट विभागातील साफसफाईच्या कामाची पाहणी करण्यासाठी राजन तेलाच्या टाकीत उतरले होते. त्यावेळी अचानक त्यांना चक्कर आली आणि ते टाकीतच कोसळले. हा प्रकार लक्षात येताच जहाजावरील इतर कर्मचाऱ्यांनी तातडीने बचावकार्य सुरू केले आणि त्यांना बाहेर काढले.
यानंतर जहाजावरील वैद्यकीय सुविधेत त्यांच्यावर प्रथमोपचार करण्यात आले. मात्र, त्यांच्याकडून कोणताही प्रतिसाद मिळत नव्हता. परिस्थितीचे गांभीर्य लक्षात घेऊन कर्मचाऱ्यांनी सॅटेलाइट कम्युनिकेशनद्वारे कंपनीच्या डॉक्टरांशी संपर्क साधला. डॉक्टरांनी प्राथमिक माहितीच्या आधारे राजन यांच्यात जीवनाची कोणतीही चिन्हे दिसत नसल्याचे सांगितले.
दरम्यान, जहाज मुंबई बंदराच्या दिशेने येत असताना याबाबत यलो गेट पोलिसांना माहिती देण्यात आली. 3 जून रोजी जहाज भाऊचा धक्का येथे पोहोचल्यानंतर राजन यांना तातडीने सर जे. जे. रुग्णालयात नेण्यात आले. तेथे डॉक्टरांनी त्यांना मृत घोषित केले.
या प्रकरणी पोलिसांनी अपघाती मृत्यूची नोंद केली आहे. प्राथमिक तपासात कोणतीही दुखापत किंवा संशयास्पद बाब आढळून आलेली नाही. कुटुंबीयांनीही मृत्यूबाबत कोणताही संशय व्यक्त केलेला नसून पोलिसांकडून पुढील तपास सुरू आहे.