नाशिक : सरकारी मालमत्तेवर डल्ला मारणाऱ्या आंतरजिल्हा चोरट्या टोळीचा नाशिकरोड पोलिसांनी पर्दाफाश करत चार जणांना अटक केली आहे. भारत संचार निगम लिमिटेड (बीएसएनएल)ची भूमिगत केबल चोरी करणाऱ्या या टोळीकडून पोलिसांनी चोरीसाठी वापरलेला जेसीबी, मालवाहू टेम्पो आणि चोरीचा मुद्देमाल असा तब्बल १ कोटी ५ लाख रुपयांचा ऐवज जप्त केला आहे. विशेष म्हणजे, केबलमधून गळालेल्या ऑईलच्या खुणांमुळे या गुन्ह्याचा उलगडा करण्यात पोलिसांना यश आले. ( Nashik Crime News )
केबलमधून गळालेल्या ऑईलच्या खुणांमुळे गुन्ह्याचा उलगडा
पोलीस उपायुक्त किशोर काळे यांनी पत्रकार परिषदेत माहिती देताना सांगितले की, ३० मे रोजी रात्री ८ ते ३१ मे रोजी सकाळी १० वाजेदरम्यान नाशिकरोडमधील (Nashik Road) बिटको चौक परिसरात बीएसएनएलच्या (BSNL) भूमिगत केबलची चोरी झाली होती. चोरट्यांनी सिमेंटचा ढापा उघडून सुमारे ३५ लाख रुपयांची केबल यंत्राच्या सहाय्याने ओढून कापून नेली होती. याप्रकरणी बीएसएनएल अधिकारी बाळासाहेब कोटकर यांनी नाशिकरोड पोलीस ठाण्यात (Nashik Road Police Station) फिर्याद दाखल केली होती.
गुन्हा दाखल झाल्यानंतर १ जूनच्या रात्री सहायक पोलीस निरीक्षक प्रवीण सूर्यवंशी व गुन्हे शोध पथक बिटको चौक ते लॅम रोड (Bitco Chowk to Lam Road) परिसरात गस्त घालत होते. यावेळी पोलिसांना एक संशयास्पद मालवाहू टेम्पो भरधाव वेगाने जाताना दिसला. पोलिसांनी पाठलाग करून वाहन अडवले असता टेम्पोच्या मागील भागातून ऑईल गळत असल्याचे दिसून आले. केबल कापताना बाहेर पडलेले हेच ऑईल असल्याचा संशय बळावल्याने पोलिसांनी चौकशी सुरू केली.
चोरीची कबुली, चौघांना अटक
कसून चौकशीत संशयितांनी चोरीची कबुली दिली. टेम्पोची झडती घेतली असता बीएसएनएल केबलचे तुकडे आढळले. तसेच चोरीसाठी जेसीबीचा वापर केल्याचेही उघड झाले. या प्रकरणात वहाब नवाज (३५, भांडुप), सुरेश वैराळ (३७, भांडुप), बसंतलाल यादव (३८, चेंबूर) आणि कमलेशकुमार रविदास (२६, बिहार) या चौघांना अटक करण्यात आली असून न्यायालयाने त्यांना पोलीस कोठडी सुनावली आहे.