Paris : फ्रेंच ओपन २०२६ मध्ये अव्वल मानांकित कॅटेरिना सिनियाकोव्हा आणि टेलर टाउनसेंड या जोडीने महिला दुहेरीचे विजेतेपद पटकावून ऐतिहासिक कामगिरी केली आहे. रविवारी (७ मे)झालेल्या रोमांचक अंतिम सामन्यात त्यांनी द्वितीय मानांकित ॲना डॅनिलिना आणि अलेक्झांड्रा क्रुनिक यांचा ६-२, ७-५ असा सरळ सेटमध्ये पराभव करीत इतिहास रचला आहे. पहिल्या सेटमध्ये सिनियाकोव्हा आणि टाउनसेंड जोडीने सुरुवातीपासूनच वर्चस्व राखले होते. मात्र, दुसऱ्या सेटमध्ये डॅनिलिना आणि क्रुनिक जोडीने चांगली झुंज दिली. चेक प्रजासत्ताकच्या सिनियाकोव्हाकडून काही चुका झाल्यामुळे ही जोडी सुरुवातीला पिछाडीवर होती, परंतु अमेरिकन खेळाडू टेलर टाउनसेंडने आपल्या अचूक विनर्सच्या जोरावर सामन्यात पुनरागमन केले. शेवटी सिनियाकोव्हाच्या शक्तिशाली सर्व्हिसमुळे या जोडीने तिसरे ग्रँड स्लॅम विजेतेपद आपल्या नावावर केले.
सिनियाकोव्हाची यशस्वी वेगवान प्रगती :
३० वर्षीय कॅटेरिना सिनियाकोव्हासाठी हे विजेतेपद विशेष ठरले आहे. तिने आतापर्यंत महिला दुहेरीमध्ये ११ ग्रँड स्लॅम पदके जिंकली असून, त्यापैकी ४ पदके रोलँड गॅरोस येथे मिळवली आहेत. पराभूत जोडी, डॅनिलिना आणि क्रुनिक यांच्यासाठी मात्र हा धक्का मोठा ठरला, कारण ऑस्ट्रेलियन ओपननंतर त्यांना सलग दुसऱ्या फ्रेंच ओपनच्या अंतिम सामन्यात पराभवाला सामोरे जावे लागले.