मुंबई : मुंबईतील छत्रपती शिवाजी महाराज आंतरराष्ट्रीय विमानतळावर महसूल गुप्तचर संचालनालयाने सोन्याच्या आंतरराष्ट्रीय तस्करांविरुद्ध एक मोठी कारवाई केली आहे. 'ऑपरेशन गोल्डन नेक्सस' अंतर्गत डीआरआयने केलेल्या या कारवाईत सुमारे ३.२ किलो परदेशी सोन्याची धूळ (वॅक्स स्वरूपात) जप्त केली असून, आंतरराष्ट्रीय बाजारपेठेत तिची किंमत अंदाजे ५ कोटी रुपये आहे. या प्रकरणात विमानतळ कर्मचाऱ्यांसह एकूण ७ जणांना अटक करण्यात आली आहे.डीआरआयच्या माहितीनुसार, या आंतरराष्ट्रीय टोळीने सोन्याच्या तस्करीसाठी एक नवीन साखळी (रॅकेट) तयार केली होती. बँकॉकहून मुंबईमार्गे प्रवास करणारे परदेशी नागरिक आपल्या शरीरात हे सोने (वॅक्स स्वरूपात) लपवून आणत असत. विमानतळावर उतरल्यानंतर कस्टम्स आणि सुरक्षायंत्रणांच्या नजरेतून वाचण्यासाठी ते विमानतळावरील स्थानिक कर्मचाऱ्यांची मदत घेत असत.
एअरपोर्टचे कर्मचारीच निघाले तस्करांचे साथीदार
या कारवाईचे सर्वात धक्कादायक वैशिष्ट्य म्हणजे तस्करांना मदत करणारे विमानतळावरील कर्मचारीच निघाले. यामध्ये बांगलादेशी आणि श्रीलंकन नागरिकांचा समावेश आहे, जे सोने वाहून आणण्याचे (कॅरिअर) काम करत होते. यामध्ये विमानतळावरील दोन बस चालक आणि एका कोच मॉनिटरचा समावेश आहे.
सोने स्वीकारणारा एजंट स्थानिक
मिळालेल्या गुप्त माहितीच्या आधारे डीआरआयने सापळा रचला होता. विमानतळ परिसरामध्ये दोन बस चालक आणि एक कोच मॉनिटर हे परदेशी नागरिकांकडून घेतलेली सोन्याची डिलिव्हरी स्थानिक एजंटला देत असतानाच अधिकाऱ्यांनी त्यांना रंगेहात पकडले.
पुढील तपास सुरू
डीआरआयने ही संपूर्ण सोन्याची जप्ती कस्टम्स कायदा, १९६२ अंतर्गत केली आहे. या कारवाईमुळे आंतरराष्ट्रीय स्तरावर चालणारी सोन्याच्या तस्करीची एक मोठी साखळी उद्ध्वस्त करण्यात भारतीय यंत्रणांना यश आले आहे. हे सोने मुंबईत नेमकं कोणाला दिले जाणार होते आणि या मागे आणखी कोणती मोठी नावे आहेत, याचा सखोल तपास सध्या डीआरआयचे अधिकारी करत आहेत.