मुख्यमंत्री देवेंद्र फडणवीस; राज्य सरकार आणि अमेरिकेच्या 'क्लीव्हलँड क्लिनिक'मध्ये सामंजस्य करार
मुंबई : महाराष्ट्राच्या वैद्यकीय क्षेत्रात तब्बल १० हजार कोटी रुपयांची (१.२ अब्ज डॉलर्स) परकीय गुंतवणूक येणार असून, अमेरिकेतील 'क्लीव्हलँड क्लिनिक'च्या सहकार्याने नवी मुंबईत 'नवी मुंबई इंटरनॅशनल मेडिसिटी' उभारली जाणार आहे. या जागतिक दर्जाच्या प्रकल्पामुळे राज्यात १० हजार रोजगार निर्माण होतील, अशी माहिती मुख्यमंत्री देवेंद्र फडणवीस यांनी बुधवारी दिली. या संदर्भातील त्रिपक्षीय सामंजस्य करारावर राज्य सरकार, क्लीव्हलँड क्लिनिक, ब्रुकफिल्ड ॲसेट मॅनेजमेंट आणि अरोधन हेल्थ सिटी यांनी स्वाक्षऱ्या केल्या आहेत.भारतातील आरोग्य सेवा, संशोधन आणि वैद्यकीय नवोपक्रमाची (इनोव्हेशन) ही पहिलीच जागतिक परिसंस्था (ग्लोबल हेल्थकेअर इकोसिस्टिम) ठरणार आहे. विशेष म्हणजे, पंतप्रधान नरेंद्र मोदी यांनी देशातील सर्वाधिक काळ सेवा देणारे निर्वाचित राष्ट्रनेते म्हणून ४ हजार ३९९ दिवस पूर्ण केल्याच्या ऐतिहासिक दिवशीच या करारावर स्वाक्षऱ्या झाल्याने हा क्षण दुग्धशर्करा योग ठरल्याचे मुख्यमंत्र्यांनी या वेळी नमूद केले.
या ऐतिहासिक करारप्रसंगी क्लीव्हलँड क्लिनिकचे मुख्य कार्यकारी अधिकारी डॉ. टॉमिस्लाव मिहाल्जेविक, कार्डिओव्हस्कुलर मेडिसिनचे अध्यक्ष डॉ. समीर कपाडिया, आर्सेलर मित्तलचे कार्यकारी अध्यक्ष आणि क्लीव्हलँडचे बोर्ड मेंबर लक्ष्मी मित्तल, इमर्जिंग मार्केट्सचे अध्यक्ष डॉ. फाल्कोन आणि राज्य शासनाचे वरिष्ठ अधिकारी प्रामुख्याने उपस्थित होते.