पुणे: पुण्यातील नवले पूल (Navale bridge) परिसरात पुन्हा एकदा भीषण अपघाताची (Accident) घटना घडली असून एका दुचाकीस्वार तरुणाचा जागीच मृत्यू झाला आहे. मध्यरात्री पावणेएकच्या सुमारास कात्रज बायपासवरून येणाऱ्या सिमेंटने भरलेल्या 10 टायरी टँकरवरील चालकाचे नियंत्रण सुटल्याने हा अपघात झाला.
मिळालेल्या माहितीनुसार, भरधाव वेगातील टँकर अचानक रस्त्यावर उलटला आणि त्याचवेळी तेथून जात असलेल्या दुचाकीवर कोसळला. या अपघातात दुचाकीस्वार रामेश्वर मच्छिंद्र उगले (वय 31) यांचा जागीच मृत्यू झाला. रामेश्वर हे मूळ बीड जिल्ह्यातील रहिवासी असून सध्या कात्रज येथे वास्तव्यास होते.
अपघातानंतर महामार्गावरील वाहतूक काही काळ विस्कळीत झाली. सिमेंटने भरलेला अवजड टँकर रस्त्यावर आडवा झाल्याने मोठी वाहतूक कोंडी निर्माण झाली होती. घटनेची माहिती मिळताच अग्निशमन दल, पीएमआरडीए, पुणे महानगरपालिका आणि पोलीस प्रशासनाचे पथक घटनास्थळी दाखल झाले.
टँकर हटवण्यासाठी आणि अडकलेल्या वाहनांना बाहेर काढण्यासाठी तब्बल तीन हायड्रोलिक क्रेनची मदत घ्यावी लागली. जवळपास तासाभराच्या प्रयत्नांनंतर वाहतूक सुरळीत करण्यात आली.
दरम्यान, अपघातानंतर पळून जाण्याचा प्रयत्न करणाऱ्या टँकर चालकाला पोलिसांनी ताब्यात घेतले आहे. त्याच्याविरोधात गुन्हा दाखल करण्यात आला असून पुढील तपास सुरू आहे.
नवले पूल परिसरात वारंवार होणाऱ्या अपघातांमुळे नागरिकांमध्ये नाराजी व्यक्त होत आहे. या मार्गावरील अवजड वाहनांच्या वेगावर नियंत्रण आणण्यासाठी प्रशासनाने प्रभावी उपाययोजना कराव्यात, अशी मागणी स्थानिकांकडून केली जात आहे.