पुणे : यंदा पावसाळा लांबल्यामुळे आणि धरणसाठ्यात घट झाल्याने पुणे महापालिकेने पाणीपुरवठ्यात २५ टक्के कपात करण्याचा निर्णय घेतला आहे. सोमवारपासून (१५ जून) शहरात सम–विषम तारखेनुसार एक दिवसाआड पाणीपुरवठा लागू होणार असून याचे सविस्तर वेळापत्रक जाहीर करण्यात आले आहे. सध्या खडकवापसला डॅम धरणसाखळीत सुमारे ५.०३ टीएमसी पाणी शिल्लक असून त्यातील सुमारे ३ टीएमसी पाणी शहरासाठी उपलब्ध आहे. या पार्श्वभूमीवर पाणीवापरावर काटकसरीचे निर्बंध लागू करण्यात आले. तसेच भारतीय हवामान विभागाने यंदा सरासरीपेक्षा कमी पावसाचा अंदाज व्यक्त केल्याने प्रशासनाने हे पाऊल उचलले आहे.
नवीन नियोजनानुसार शहरातील विविध भागांमध्ये सम आणि विषम तारखांना आलटून-पालटून पाणीपुरवठा होणार आहे. काही मध्यवर्ती भागांमध्ये दररोज पाणीपुरवठा सुरू राहणार असून उपनगरांमध्ये एक दिवसाआड पुरवठा होईल. तथापि, दूषित पाणीपुरवठा किंवा तांत्रिक अडचणींचा विचार करून शहराच्या पूर्व भागासह काही उपनगरांना या वेळापत्रकातून वगळण्यात आले आहे. महापालिकेने वॉशिंग सेंटर आणि जलतरण तलावांवरील पाण्याच्या वापरावर पूर्ण बंदी घातली आहे. वाहन धुणे, उद्यानांसाठी किंवा बांधकामासाठी पिण्याच्या पाण्याचा वापर आढळल्यास कठोर कारवाई केली जाणार आहे. सोसायट्यांमध्येही वाहन धुण्यावर निर्बंध घालण्यात आले असून नियमभंग करणाऱ्यांवर पथकांमार्फत कारवाई करण्यात येणार आहे.ज्या भागात पाणीपुरवठा कमी असेल, त्या ठिकाणी आवश्यकतेनुसार टँकरद्वारे पाणीपुरवठा करण्याचे नियोजन करण्यात आले आहे. मात्र, टँकरचालक किंवा व्यावसायिकांकडून कृत्रिम टंचाई निर्माण केल्यास फौजदारी कारवाई केली जाणार असल्याचा इशारा प्रशासनाने दिला आहे. महापालिकेने नागरिकांना पाणी काटकसरीने वापरण्याचे आवाहन केले आहे. पाण्याच्या टाक्या ओव्हरफ्लो होऊ न देणे, गळती तातडीने दुरुस्त करणे आणि ‘ग्रे वॉटर’चा पुनर्वापर करण्याचेही सुचवण्यात आले आहे.