मुंबई (विशेष प्रतिनिधी): मुंबई महानगरपालिकेच्या सेठ जी. एस. वैद्यकीय महाविद्यालय व के. ई. एम. रुग्णालयातील एमबीबीएस शिक्षण घेणारी विद्यार्थिनी सेजल पवार हिने एका ऑनलाइन विनोदी कार्यक्रमादरम्यान केलेल्या काही विधानांची रुग्णालय प्रशासनाने गंभीर दखल घेतली आहे. तथ्यशोधन प्रक्रियेदरम्यान विद्यार्थिनीच्या काही विधानांचे स्वरूप आक्षेपार्ह व असंवेदनशील असल्याचे निदर्शनास आल्यानंतर तिने रुग्णालय प्रशासनाकडे लेखी माफीपत्र सादर केले आहे. आपल्या काही वक्तव्यांमुळे सर्वसामान्य नागरिकांच्या भावना दुखावल्या जाऊ शकतात, याची कबुली तिने माफीपत्रात दिली आहे.
मुंबई महानगरपालिकेच्या आरोग्य समितीचे अध्यक्ष हरिष भांदिर्गे यांच्या सूचनेनुसार रुग्णालय प्रशासनाने वरिष्ठ प्राध्यापकांचा समावेश असलेली प्राथमिक तथ्यशोधन समिती तातडीने स्थापन केली. समितीने संबंधित कार्यक्रमाचे संपूर्ण व्हिडिओ रेकॉर्डिंग पाहून विद्यार्थिनीशी सविस्तर चर्चा केली.
रुग्ण, दिवंगत व्यक्ती, त्यांचे कुटुंबीय, वैद्यकीय व्यवसाय तसेच संस्थेची प्रतिष्ठा यांचा अवमान करणारे कोणतेही वर्तन किंवा सार्वजनिक वक्तव्य स्वीकारार्ह नसून, सार्वजनिक आरोग्य व्यवस्थेबाबत असंवेदनशीलता दर्शविणाऱ्या अशा प्रकारच्या कृतींकडे महापालिका प्रशासन अत्यंत गांभीर्याने पाहत आहे.
हे प्रकरण राष्ट्रीय वैद्यकीय आयोग (NMC) यांच्या मार्गदर्शक तत्त्वांनुसार, विद्यापीठीय नियमावली तसेच संस्थेच्या शिस्तभंग विषयक तरतुदींनुसार हाताळण्यात येत आहे.
यासंदर्भात संबंधित विद्यार्थिनीच्या पालक अथवा संरक्षकांना १३ जून २०२६ रोजी संस्थेत उपस्थित राहण्यास सांगण्यात आले आहे. त्यांच्या उपस्थितीत विद्यार्थिनीचे समुपदेशन करण्यात येणार असून, सक्षम प्राधिकरणामार्फत लागू नियमांनुसार योग्य तो निर्णय घेऊन त्याबाबतचा आदेश लेखी स्वरूपात जारी करण्यात येईल.
तसेच संबंधित आक्षेपार्ह अथवा असंवेदनशील ऑनलाइन क्लिप्स व पोस्ट्स हटविण्याबाबत संबंधित डिजिटल प्लॅटफॉर्मशी आवश्यक संवाद साधण्याचा विचार प्रशासनाकडून केला जात असल्याचे आरोग्य समिती अध्यक्ष हरिष भांदिर्गे यांनी स्पष्ट केले.
माध्यम प्रतिनिधी तसेच सर्व संबंधितांना संस्थेची विनंती आहे की, आक्षेपार्ह क्लिप्स किंवा त्यांतील अंशांचे पुढील प्रसारण टाळावे, जेणेकरून कोणाच्याही भावना दुखावल्या जाणार नाहीत अथवा संबंधित व्यक्ती व संस्थेच्या प्रतिष्ठेला बाधा पोहोचणार नाही, असेही आवाहन त्यांनी केले.