फ्लोरिडा : फिफा वर्ल्ड कप 2026 ग्रुप-H मध्ये सौदी अरेबिया आणि उरुग्वे यांच्यात महत्त्वाचा सामना झाला. या सामन्यात कोणत्याही संघाला विजय मिळवता आला नाही. यामुळे सामाना १-१ च्या बरोबरीत संपला.दोन्ही संघांनी आक्रमक खेळ करत विजयासाठी जोरदार प्रयत्न केले,मात्र अखेर प्रत्येकी एक गोल करत गुणांची विभागणी करावी लागली.
सौदी अरेबियाची पहिली आघाडी
सामन्याच्या सुरुवातीला उरुग्वेने चेंडूवरील नियंत्रण राखत आक्रमक खेळ केला. मॅक्सी अराउजो आणि फेडेरिको विनास यांनी गोल करण्याचे प्रयत्न केले,पण सौदी अरेबियाचा अनुभवी गोलरक्षक मोहम्मद अल ओवैस याने चांगली कमगिरी करत संघाला अडचणीत बाहेर काढले.यानंतर सौदी अरेबियाने सेट पीसवर दबाव निर्माण केला. एका कॉर्नर किकवर हसन अल तंबाक्ती याचा हेडर उरुग्वेचा गोलरक्षक फर्नांडो मुस्लेरा पूर्णपणे रोखू शकला नाही. त्यानंतर आलेल्या रिबाउंडवर अब्दुलेलाह अल अमरी याने अचूक फिनिश करत सौदी अरेबियाला 1-0 अशी आघाडी मिळवून दिली. दुसऱ्या हाफमध्ये उरुग्वेने आक्रमणाची धार अधिक तीव्र केली. मॅन्युअल उगार्टे याचा जोरदार शॉट पोस्टला लागून परत आला, तर फेडेरिको विनासनेही अनेक संधी निर्माण केल्या.अखेरीस 80 व्या मिनिटाला उरुग्वेला यश मिळाले. विनासच्या हेडरला अल ओवैस पूर्णपणे नियंत्रित करू शकला नाही आणि चेंडू रिबाउंड झाल्यानंतर मॅक्सी अराउजो याने गोल करत सामना 1-1 असा बरोबरीत आणला.
मुस्लेराचा ऐतिहासिक विक्रम
या सामन्यात उरुग्वेचा गोलरक्षक फर्नांडो मुस्लेरा याने इतिहास रचला. 39 वर्षे 364 दिवस वयात वर्ल्ड कपमध्ये खेळणारा तो उरुग्वेचा सर्वात वयस्कर खेळाडू ठरला.यापूर्वी हा विक्रम उरुग्वेचे माजी कर्णधार Diego Godín यांच्या नावावर होता. मुस्लेराने त्यांच्यापेक्षा तीन वर्षांहून अधिक वयात वर्ल्ड कप सामना खेळत नवा विक्रम आपल्या नावावर केला.
दोन्ही संघांसाठी महत्त्वाचा गुण
या बरोबरीनंतर दोन्ही संघांनी प्रत्येकी एक गुण मिळवला असून ग्रुप-H मधील पुढील सामन्यांचे महत्त्व अधिक वाढले आहे. सौदी अरेबियाने शिस्तबद्ध बचाव आणि सेट पीसवर प्रभावी खेळ दाखवला, तर उरुग्वेने पिछाडीवरून पुनरागमन करत पराभव टाळला.उरुग्वेसाठी मॅक्सी अराउजोचा गोल आणि मुस्लेराचा विक्रम, तर सौदी अरेबियासाठी अब्दुलेलाह अल अमरीचा महत्त्वाचा गोल हा या सामन्याचा मुख्य आकर्षण ठरला.