मुंबई : मुलुंड (Mulund) परिसरातील एका व्यावसायिकाला धमकावून खंडणी उकळणाऱ्या रणदीप हरबिंदरसिंग गुजराल (वय 40) या रिलस्टारला अटक (Arrest) केली. या प्रकरणात आरोपीच्या कुटुंबातील दोन सदस्यांसह इतर काही जणांचाही सहभाग उघडकीस आला असून पोलिसांकडून त्यांची चौकशी करण्यात येणार आहे. गुन्हे शाखेच्या अधिकाऱ्यांनी रविवारी (14 जून) रोजी तरुणाला अटक केले असून किल्ला न्यायालयाने रणदीपला 18 जूनपर्यंत पोलीस कोठडी सुनावली आहे.
मिळालेल्या माहितीनुसार, तक्रारदार हे गोवंडी परिसरात राहणारे व्यावसायिक असून मुलुंड येथे त्यांचे ‘पंजाबी पनीर’ नावाचे दुकान आहे. काही दिवसांपूर्वी आरोपी रणदीप गुजराल त्यांच्या दुकानात आला होता. त्याने स्वतःची ओळख शासकीय अधिकारी म्हणून करून देत दुकानातील दुग्धजन्य पदार्थ निकृष्ट दर्जाचे असल्याचा आरोप केला.
याचवेळी त्याने दुकानात व्हिडीओ चित्रीकरण करून तो सोशल मीडियावर व्हायरल केला. तसेच दुकानाची बदनामी करून व्यवसाय बंद पाडण्याची धमकी दिली. ही बदनामी थांबवायची असेल तर पैसे द्यावे लागतील, अशी मागणी करत त्याने व्यावसायिकाकडून ऑनलाइन 56 हजार रुपये उकळले. उर्वरित रक्कम न दिल्यास आणखी बदनामी करण्याची धमकीही दिली होती.
या प्रकारामुळे घाबरलेल्या व्यावसायिकाने मुलुंड पोलीस ठाण्यात तक्रार दाखल केली. प्राथमिक चौकशीनंतर पोलिसांनी आरोपीविरुद्ध भारतीय न्याय संहितेअंतर्गत विविध कलमांनुसार गुन्हा दाखल केला. पुढील तपास गुन्हे शाखेकडे सोपवण्यात आला.
रविवारी सायंकाळी आरोपी उर्वरित खंडणीची रक्कम घेण्यासाठी मुलुंडमधील सोनापूर सिग्नल परिसरात आला असता, आधीपासूनच सापळा रचून बसलेल्या गुन्हे शाखेच्या पथकाने त्याला रंगेहाथ अटक केली.
चौकशीदरम्यान आरोपीने शासकीय अधिकारी असल्याची खोटी बतावणी करून व्यापाऱ्यांकडून खंडणी उकळल्याची कबुली दिली. पोलिसांनी त्याच्याकडून 2 लाख 85 हजार रुपयांची रोकड जप्त केली आहे.
तपासात आरोपीच्या कुटुंबातील दोन सदस्य तसेच एका वृत्तपत्रातील कर्मचाऱ्याचाही सहभाग समोर आला आहे. सोशल मीडियाचा वापर करून व्यापारी आणि व्यावसायिकांना ब्लॅकमेल करणे, खोटे व्हिडीओ व्हायरल करणे आणि त्यांच्याकडून खंडणी उकळणे हा या टोळीचा मुख्य व्यवसाय असल्याचे प्राथमिक तपासात स्पष्ट झाले आहे.
दरम्यान, या टोळीने आणखी किती व्यापारी आणि व्यावसायिकांना लक्ष्य केले आहे, याचा शोध पोलीस घेत आहेत. आरोपीच्या सोशल मीडिया खात्यांची आणि आर्थिक व्यवहारांचीही सखोल चौकशी सुरू आहे.