महाबळेश्वर (सातारा) : निसर्गाच्या कुशीत वसलेल्या आणि घनदाट जंगलासाठी ओळखल्या जाणाऱ्या महाबळेश्वरच्या आंबेनळी घाटात एका युवकाचा जीव अक्षरशः 'वाचला'. लघुशंकेसाठी थांबलेला असताना अचानक तोल जाऊन २०० फूट खोल दरीत कोसळलेल्या युवकाला स्थानिक ट्रेकर्स आणि रेस्क्यू टीमने मृत्यूच्या दाढेतून सुखरूप बाहेर काढले. या धाडसी मोहिमेची चर्चा सध्या संपूर्ण परिसरात होत आहे.
नेमकी घटना काय?
मिळालेल्या माहितीनुसार, शनिवारी रात्री एक युवक हॉटेलवर कामासाठी जात असताना आंबेनळी घाटातील मेटतळे धबधब्याजवळ लघुशंकेसाठी थांबला होता. यावेळी अंधार आणि पावसाळी वातावरणामुळे त्याचा अचानक तोल गेला आणि तो थेट २०० फूट खोल दरीत कोसळला. हा थरार काही नागरिकांच्या निदर्शनास येताच त्यांनी तातडीने प्रतापगड सर्च ॲण्ड रेस्क्यू टीमला पाचारण केले.
असे राबविले धाडसी बचावकार्य
घटनेची तीव्रता लक्षात घेऊन रात्री ११ वाजण्याच्या सुमारास बचाव पथक घटनास्थळी दाखल झाले. महाबळेश्वर पोलीस, प्रतापगड सर्च ॲण्ड रेस्क्यू टीम आणि महाबळेश्वर ट्रेकर्स यांनी एकजुटीने 'रोप रेस्क्यू ऑपरेशन' सुरू केले. पावसाळी रात्र, अतिशय निसरडा परिसर आणि दाट अंधार अशा प्रतिकूल परिस्थितीत बचाव पथकातील सदस्यांनी जीवाची बाजी लावून दरीत उतरून जखमी युवकाचा शोध घेतला.
तब्बल अडीच तासांच्या अथक प्रयत्नांनंतर, मध्यरात्री दीड वाजण्याच्या सुमारास पथकाने युवकाला सुरक्षितरित्या वर काढले. त्याला तातडीने महाबळेश्वर ग्रामीण रुग्णालयात हलविण्यात आले. सुदैवाने तो शुद्धीवर असून, सध्या त्याची प्रकृती स्थिर असल्याचे डॉक्टरांनी सांगितले.
पथकांचे मोलाचे योगदान
या यशस्वी मोहिमेत प्रतापगड सर्च ॲण्ड रेस्क्यू टीमचे अनिकेत वागदरे, अजित जाधव, ऋषिकेश जाधव, आशिष बिरामणे, संकेत सावंत, मुन्ना उतेकर, अवी उतेकर, आदेश मोरे, निखिल सावंत, अभी सपकाळ, रूपचंद मंडल, गणेश वागदरे, विक्रांत जाधव आणि महाबळेश्वर ट्रेकर्सचे सोमनाथ वागदरे, सुजित कोळी, दीपक ओंबळे व श्रीकांत नावीलकर यांनी मोलाची कामगिरी बजावली.
सावधानतेचा इशारा: आंबेनळी घाट हा पावसाळ्यात अतिशय धोकादायक ठरतो. तीव्र वळणे आणि दऱ्यांमुळे पर्यटकांनी तसेच वाहनधारकांनी घाटात वावरताना विशेष काळजी घेण्याचे आवाहन स्थानिक प्रशासनाकडून करण्यात आले आहे. बचाव पथकांच्या तत्परतेमुळे एका तरुणाला 'नवजीवन' मिळाले असून, त्यांच्या या धाडसाचे सर्वत्र कौतुक होत आहे.